Shillong, Rymphang 16
U National President jong ka National People’s Party (NPP), Conrad K Sangma, u la pynpaw ïa ka jingkyrmen ba ka NPP kan ïoh ban bat biang ïa u lakam synshar ha Khasi Hills Autonomous District Council (KHADC) bad Jaiñtia Hills Autonomous District Council (JHADC) hadien ka ilekshon ka ban long la 21 tarik u Rymphang.
Ïa kane na ka liang jong u Conrad u la pynpaw ha ka jingïalang ïalap ilekshon ban pan jingkyrshan na ka bynta u MLA ka Jirang bad kyrtong ka NPP Bah Sosthenes Sohtun u ban ïakhun ha kane ka ilekshon MDC.
U Conrad u la ong ba kane ka ilekshon ADC ka long kaba kongsan bha bad bynrap “Bun ki seng saiñpyrthei ki la pyrshang ban pynshit ïa u paidbah da ka jingsngew ïapher jaidbynriew ha kane ka ilekshon. Ki la pyrshang ban phiah bad pynïapait-pynïapra ïa ki briew jong ngi. Ka NPP ka dei kaba burom ïa baroh ki jaidbynriew bad ka la trei ban wanrah ïa ka roi ka par ïa baroh. Ngi hap ban ïatylli bad vote ïa ka NPP ban ai ka jubab kaba biang eh ïa ki seng saiñpyrthei kiba pyrshang ban pynsaphriang ïa ka jingïashun bad ka jingbym shaniah”.
Haba pynpaw ba ka Jylla Meghalaya ka dei kaba tip ïa ka jingdon ki nongshong shnong kiba ieid ïa ka jingsuk, u Conrad u la kyntu ïa ki paidbah ba kin pyrkhat ïa ka lawei jong ka Jylla bad ban ïatylli ha ka ban vote ïa ka NPP.
“U MLA jong ngi, Bah Sosthenes Sohtun, u la shim ïa ka bynta ban ïatei kum u MLA bad u la pynthikna ïa ka jingwan ki kam pynroi bapher-bapher hapoh ka konstitwensi ha kine ki hynñiew snem ba la leit. Ka long kaba donkam ban vote ïa u kum u MDC ban ailad ïa u ba un treikam bad ka Sorkar ha kaban pynkhlaiñ ïa ka District Council”.
U Conrad u la ïaroh ïa u Bah Sosthenes kum u nongïalam bad ka jingaiti jong u ban trei na ka bynta u paidbah. “U ju kren beit man ka por ïa ki kam ba ïadei bad ka ïakajia khappud bad ka jinglong ka suk ka saiñ kiba mih ha khappud bad ju phah tuklar beit ha ka Sorkar,” u la bynrap.
Haba pynpaw ba ki don beit ki jingeh ha man ki kyrdan bapher-bapher, u Conrad u la ong ba ki District Council ki shim ïa ka bynta ba kongsan bha ban pynlong ïa ka jingïakren, ïasyllok bad ban ïada ïa ka bha ka miat jong ki jaidbynriew riewlum trai ri trai muluk.
“Ka lyer jong ka NPP ka khlaiñ bha ha baroh san tylli ki konstitwensi ka Ri-Bhoi. Ki paidbah ka District ki la pyni ïa ka jingshaniah ha ki nongïalam jong ka seng bad ngi ngeit skhem ba ha ka risol jong ka ilekshon ADC kan long kaba noh sha ka NPP,” u la bynrap.
Haba pynpaw ïa ka jingsngewskhem ban ïoh bat biang ïa ka bor synshar ha KHADC bad JHADC, u Conrad u la ong ba ki Executive Committee ha baroh artylli ki Council kin dei kiba ïalam da ka NPP.
“Kiba bun ki MLA ba mynta na kiwei ki seng saiñpyrthei kila kren pyrshah ïa la ka jong ka seng. Ki la kulmar jingmut bad duh jingshaniah ha la ki jong ki nongïalam. Ki la kren paidbah pyrshah ïa la ka seng. Kane ka dei ka dak kaba paw shai ba kila pdiang ïa ka jingshah rem bad kren ruh ha kylleng ki jaka ba ki paidbah ki dei ban mih bad vote ïa ka NPP,” la ban jur u Conrad.
