Shillong, Rymphang 16
Ka Nongthymmai SC ka la lah ban wanphai da ka jingjop ïa ka Sawmer SC da 3-2 kol ha ka OC Blue Shillong Premier League 2024, katba ka Rangdajied United FC ka la pynliem noh ïa ka Langsning FC da 3-1 kol ha ka sngi Saitjaiñ ha SSA Stadium kaba ha First Ground, Polo.
Wat la ka Sawmer ka la lah ban thep ar kol lyngba u Diego Khyriem (9′) bad u Shanmeiaki Warlarpih (25′), hynrei ka Nongthymmai ka la ïakhun tyngeh ban pynphai kylla lyngba u Rudolf Shadap (14′), Ïohborlang Mukhim (38′) bad u Donboklang Majaw (65’P).
Ha kawei pat ka liang, hadien ka jingbym lah ban pynurlong ha ka kylla step, ka Rangdajied ka la lah ban thep kol lyngba u Arlangky Nongsiej (54′ & 87’P) bad u Benny Khriam (59′), katba ka Langsning ka la lah ban pynphai kylla shi kol lyngba u Roikhihbha Nongtdu (61′).
Kane ka long ka jingjop kaba shiphew sien jong ka RUFC ha kane ka samoi bad mynta ka la don ha ka kyrdan ba-ar ryngkat 32 poiñ. Hynrei kiwei pat ki ar tylli ki kynhun kiba don ha ka thup ba lai, ka Mawlai SC kaba dang lamkhmat bad ka Shillong Lajong FC ba wan ha ka kyrdan balai, ki dang sah sa ar sien ïakhun. Ka Mawlai, 32 poiñ, ka la tam lyngba ka jinglah ban thep kol bun na ka bynta ban tam ïa ka Rangdajied. Ka Langsning ka dang sah ha ka kyrdan ba saw. Lada ka Sawmer ka lah ban ïoh ïa ka jingjop kan jin da la pynlong ïa kane ka kynhun ban kiew sha ka kyrdan ba saw hynrei da kane ka jingshah rem ka la pynlong ban ïai sah ha ka kyrdan ba hynñiew. Ka Nongthymmai ka dang don ha ka kyrdan ba-ar na shatrai ryngkat ka Ryntih, kaba la thikna ban hiar noh sha ka First Division.
Ka jingïalehkai ha ka Lah Sngi U Blei kan long hapdeng ka Ryntih FC pyrshah ïa ka Shillong Lajong ha ka por 11 baje mynstep, katba ka Nongrim Hills SC ïa ka Mawlai ha ka por 2:30 nohphai sngi.
