Imphal, Shillong:
Ka sorkar Manipur ka la khot ïa ki nongshong shnong ba kin long kiba jai-jai bad ban kiar na kaba ngat ha ki khubor bym lah ban pynshisha, ki khubor lamler, ne ki jingpyntip bakla kiba lah ban pynmih ïa ka jingsyier ne pynthut ïa ka shongsuk shongsaiñ jong ka jylla.
Ha ka jingpynbna pathai khubor ba la pynmih da u Chief Secretary u P K Singh ha kine ki khyndiat sngi ba la leit, ka sorkar ka la pynpaw ïa ka jingsngewkhia halor ki kam jong ki katto katne ki briew bad ki kynhun kiba lah ban thmu ban pynphriang ïa ki jingtip kiba bakla, ki jingthoh kiba pynkhihwin, lane ki khana kiba la shna thok ha ka jingpyrshang ban pynmih ïa ka jingkulmar bad pynthut ïa ka jingïatylli ha ka imlang-sahlang.
“Kine ki jingpyrshang ba sniew ki long ban bet ia ka jingtieng bad ka jingleh be-aiñ. La kyntu jur ïa ki paidbah ba kim dei ban kheiñ snep ïa kum kine ki jingpyntip bakla bad ki jingpynkhihwin,” ong ka jingpynbna.
Ban ïakhun pyrshah ïa kane ka jingeh, ka sorkar ka la buh ïa ka Control Room kaba 24/7 ha kaba ki nongshong shnong ki lah ban pynshisha ïa kino kino ki khubor ne jingtip ba ki ïakynduh.
Ïa ka Control Room lah ban phone ha u number 9485280419.
Ki bor pynïaid ki la pynthikna ba kino kino ki jingpyrshang ban pynshit ïa ka jingïakynad ne ban pynsaphriang ïa ki khubor lamler yn sa pynngat da ki kyndon aiñ kiba tyngeh.
Nalor kata, ka sorkar ka la khot ïa ki nongïalam shnong, ki seng bhalang, ki seng niam, bad ki seng samla pule ban ïatylli ha kaba pynroi ïa ka jingsuk, ka jingshaniah, bad ka jingïatylli ha baroh ki shnong.
La kyntu ïa ki nongshong shnong ban wad jingshai lyngba ki lad ba la pynbna bad ban ïakynduh ïa ki Control Room lane ki bor synshar shnong lada don kino kino ki jingartatien khnang ba kan ym wanrah kano kano ka jingkulmar.
Ka sorkar ka la ban jur ba ka jingpynneh ïa ka jingsuk jingsaiñ ka dei ka jingkitkhlieh lang, da kaba kyntu ïa baroh ki nongshong shnong ban buh hakhmat eh ïa ka jingïatylli bad ban noh synñiang sha ka jingroi bad ka shongsuk-shongsaiñ jong ka jylla.
