Shillong, Rymphang 17
Ka BJP-Meghalaya ha ka Lah Sngi U Blei ka la dawa na ka Sorkar Jylla ban tohkit halor ki jingkynnoh kiba la mih pyrshah ïa ka University of Science and Technology Meghalaya (USTM).
“Ha kane ka kynti, ka jingkynnoh ka long kaba khia bad ka dawa ïa ka jingtohkit kaba bniah da ka tnad treikam ka bym shah liang. Wat ka jingsuba kaba rit eh halor ki ‘Degree’ bad ki syrnot thok, ka don ka jingktah kaba jur ïa ka lawei ki samla pule, kaba wanrah ryngkat bad ka ïa ka jinglah ban pynsniew ïa kiba bun ki lawei kiba dang sdang; ha kum kane ka jinglong-jingman, ka kylla long ka jingkitkhlieh jong ka Sorkar ban tohkit bad sei madan ïa ka jingshisha sha ki paidbah,” ong u State General Secretary ka BJP-Meghalaya, Bah Wankitbok Pohshna ha ka kyrwoh khubor.
“Wat la ka long kaba shisha ba uno-uno u lah ban mih shakhmat bad ka jingkynnoh, hynrei ka jingshisha ka long ba ïa ki jingkynnoh la wanrah da u Myntri Rangbah jong ka Jylla ba marjan, kaba ha kawei ka liang, ka pynlong ïa kane ka mat kaba sngewkhia shisha,” u la ong.
U Bah Pohshna u la ong ruh ba ka Sorkar Assam ka byrngem ban weng jingithuh noh ïa ki kyrdan pule ‘Degree’ jong ka USTM na ka bynta ban thep ïa ki kam Sorkar, ha kawei ka liang, ka ban ktah lang bad buh jingma ïa ka jingkyrmen lawei jong kiba bun.
“Ha kum kane ka jinglong-jingman, ka Sorkar ba la jied, kaba hap jubab sha ki paidbah, kam dei ban ap ïa ka jingpyntip kaba tikna, hynrei ka dei ban sdang mardor ïa ka jingtohkit (judicial) ba laitluid,” u la ong.
U Bah Pohshna u la ong ruh ba lada ki jingkynnoh ki long kiba shisha, ka jingshimkhia ba mardor katkum ka aiñ kan pynduna ïa ka jingshah ktah kaba la jia ïa ki samla pule kiba pule mynta ha USTM.
Shuh shuh u la bynrap, “Lada ki jingtohkit ki pynshisha ba ki jingkynnoh ki long kiba bakla ne ki bym don nongrim, kata ka jingtieng hapdeng ki samla pule kan sa jai-jai bad hiar haduh katta-katta; namarkata ka daw, ka Sorkar Meghalaya ka dei ban leh eiei mynta.”
Hashuwa, u Myntri Rangbah ka Assam, Himanta Biswa Sarma ha ka Sngi U Blei u la kynnoh pyrshah ïa ka USTM, da kaba kam ba kane ka shlem pule ka la ai da ki syrnot bad ‘Degree’ thok sha ki samla pule.
