Nongpoh, Rymphang 17
Ka rynsan ïalap ilekshon kyllum jong ki kyrtong ban aireng ïa ka ilekshon MDC na Umroi konstitwensi kaba la pynlong da ki san shnong ba kynthup ïa ka Itsohpa-ir, Mynri Umsning, Khweng, Liarsluid bad Madan Rtiang ha madan phutbol ka shnong Liarsluid ha ka Lah Sngi U Blei wat lada baroh san ngut ki kyrtong kim shym la poi satia, hynrei ka la ïaid beit ïaid ryntih.
Ha kane ka rynsan ïalap ilekshon la wan ïashim bynta tang ar ngut ki kyrtong, kata u Bah George B Lyngdoh kum kyrtong shimet lem bad u Bah Rangkynsai Khar-buki kum kyrtong ka NPP, katba lai ngut kiwei pat ki kyrtong ba kynthup ïa u Bah Isynei Hinge na ka VPP, ka samla Naphishisha Marweiñ na ka UDP bad u Bah MD Syiem na ka Congress kim shym la wan poi satia.
Haba ai jingkren ha kane ka sngi, u Bah Rangkynsai Kharbuki MDC ba mynta ka Umroi konstitwensi, u la ong ba kum u MDC, ka jingthmu ba kongsan eh kam dei ban wanrah skhim hynrei ban pynkhlaiñ bad pynneh ïa ki riti ki dustur ban pynneh ïa ka khyndew ka shyiap da kaba ïathuh ba ha ka jinglong MDC bad kum u Executive Member ka KHADC, la lah ban pynlong aiñ ïa ka Land Act kaba dei kawei na ki aiñ ba kongsan eh ban ïada ïa ka khyndew ka shyiap nalor ka Administration of Elaka Amendment Act 2023, ka KHADC Regulation and Envisioned of Land Act 2021, ka Khasi Social Custom of Lineage Amendment Act, 2023.
Katba u Bah George B Lyngdoh haba ai jingkren u la kynthoh jur ïa ka jingtuklar politik jong ka District Council bad ka riti synshar da kaba ïuhroit bad kylliang shiphang-shiphang ïa ki Syiem, ki Sordar, Lyngdoh bad ïa ki Rangbah Shnong kiba la jied katkum ka riti ka dustur bad ruh lyngba ki paidbah.
U Bah George u la ong, lada ka District Council kan shu leh politik kumne ha kaba ïadei bad ka jingthung ïa ki Syiem, ki Sordar, ki Lyngdoh bad ki nongïalam shnong, ka Ri Khasi kan shu jot bad pynpaw ba ka District Council ka dei ban burom ïa ki riti ki dustur bad jingjied jong ki paidbah ïa ki Rangbah Shnong. U la ong ba kane ka jingtuklar jong ka District Council kam dei shuh kaba thymmai, hynrei kaba jia naduh ki EC barim ter ter haduh kine kiba mynta.
U la ong ruh ha kaba ïadei bad ka khyndew ka shyiap, la ïohi kiba bun bah ki nongshong shnong khamtam ha Umroi konstitwensi ki la kylla ki poiwir ha la ka ri lajong bad shem jingeh ban ïoh wat tang shi nongrim ïing khamtam ki longïing kiba kamai kynthei marwei, hynrei ka District Council bad ka Sorkar Jylla kim shym la leh eiei halor kane ka bynta kaba la donkam ban leh eiei la ka dei na ka District Council ne ka Sorkar Jylla.
U Bah George u la buh jingkylli ruh balei ka Trading License jong ka District Council kam treikam satia kum ha ki len shipai, ka ophis ICAR, NECAS, NERI bad kiwei de ki ophis jong ka Sorkar Kmie halor ka ïohkam ïohjam ki khun samla ka thaiñ bad pynpaw ba kane ka dei ba ka District Council naduh ba la seng ïa ka ha u snem 1952 haduh kine ki sngi, kam shym la leh eiei ban tuklar halor kane ka bynta kaba long kum ka jingban beiñ ïa ki paidbah trai ri trai muluk.
