Shillong, Rymphang 18
U MDC ba mynta ka Mawlai konstitwensi uba dei ruh u kyrtong shimet ha ka shap jong u Mawbynna, Bah Teiborlang Pathaw ha ka Sngi Ba-ar u la ther ïa u MLA, Bah Brightstarwell Mar-bañiang uba la kynthoh naphang, khamtam ha kaba ïadei bad ka jingsoi ïa ka shithi kyrshan jong ki MDC ïa ka Sorkar halor ka kam pynbeit pud bad ka Assam.
Haba kren ha ka rynsan ïeng lang jong ki kyrtong ba la pynlong da ka Mawlai Town Dorbar (MTD) ha Mawlai Nonglum, halor ka jingsei kot u MLA ka Mawlai ban kynnoh ba u la soi ïa ka shithi ban kyrshan ïa ka MoU pynbeit pud ka Sorkar MDA, ban die lilam ïa ki jaka khappud sha Assam, u MDC u la ong, da wad jingtip bha shwa kaei ka daw ba ki nongmihkhmat ki la shim ban kyrshan ïa ka Sorkar.
“Lada phi lah ban pynshisha ba ngi la die lilam, nga kloi ban shongthait noh na ka kam saiñ hima-sima”, u la ong.
“Ha district council ngim don ka bor ban ïasoi MoU ba pynbeit ka Sorkar Assam bad Meghalaya. Sanphew snem ngi la ïoh ïa ka Jylla jong ngi, haduh mynta ym pat lah ban pynbeit ïa u pud u sam, haba ngi ïohi ïa ka Sorkar kaba mynta ka shim khia ban pynbeit ïa u pud u sam khnang ban lait ïa ka jingïaumsnam, ngi ai ka jingkyrshan ïa ka Sorkar, hynrei ngim don bynta eiei ban die lilam kumba phi la ïalam bakla ïa ki nongshong shnong Mawlai”, u la ong.
Da kaba kdew ïa ki jaka ba la dep pynbeit pud ha ka kylla ba nyngkong, Bah Pathaw u la buh jingkylli ïa u MLA, ki jaidbynriew kiba kumno ba ki kwah ban ïada ma ki?
“Nga la long kum u EM ba peit ïa ka khyndew ka shyiap, nga la leit shaduh kito ki jaka. Ka Tarabari, ka Gizang, Hahim, ka Boklapara, Khanapara, Pilangkita bad Ratacherra, phi sngew ïahap ba ki dei ki jaka ba shong ki Khasi jong ngi kita? Kine ki jaka sa leit peit, ym don shuh ki jaidbynriew jong ngi kiba shong ha kito ki jaka. Ngam tip i (MLA) kren ïa ka jaidbynriew ba kumno ba ki kwah ban ïada ma ki?”, u la ong, ha kaba u la bynrap shuh shuh ba kine ki don ka jingpyrkhat kaba jngai bha na ka bynta jong ki.
Halor ka jingkob u MLA ban wan para marwei, u Bah Pathaw u la ong ba um don por ban leit ïakynduh para marwei namar um dei u briew ba khlem kam khlem jam, bad u bunkam ban trei na bynta ki paidbah ka shnong Mawlai.
“Ngam don por ban wan ïakynduh bad phi para marwei namar nga bunkam na ka bynta ban im sngi ban trei na ka bynta ki paidbah nongshong shnong ka Mawlai. Nga don por tang ban leit ïakynduh ïa ki paidbah ka shnong Mawlai, ngam don por ban ïakynduh ïa phi namar nga dei u briew ba bunkam bha na ka bynta ka bit ka biang ki paidbah ka shnong Mawlai”, la ong u MDC.
Ha kaba ïadei bad ka jingong u MLA ïa u Bah Pathaw ba u dei u dngiem, na ka liang une u rangbah u la ong, “Nga la peit ïa la jong ïoh nga long shisha kum u dngiem. Tang kawei u leh aïu, u dngiem u leit wad ïa ka ngap. Nga, nga dei u dngiem ban leit wad ïa ka ngap na ka bynta jong phi ki nongshong shnong ka Mawlai”.
Shuh shuh, haba pynshai biang halor ka jingbym ngeit ba u la iehnoh na ka jinglong dkhot ha ka NPP wat hadien ba u la dep mih noh, u Bah Pathaw u la ong ba um donkam ban pynngeit ïa ki bad kaei kaba u la pyni ïa u paidbah un ym thok.
“Ngim don bynta eiei shuh bad ka NPP, haba nga la ieh ïa kane ka seng nga la ieh, bad lada phim pat lah ban ngeit shu ïathuh ïa nga ka address ba ngan phah ïa kane ka shithi iehnoh kam sha phi”, la ong u Bah Teibor Pathaw.
