Shillong, Rymphang 18
Ka Barcelona ka la jam sha ka kyrdan nyngkong jong ka lympung La Liga hadien ba ka la lah ban pynliem noh ïa ka Rayo Vallecano da 1-0 kol ha la ïing bad kane ka la wan urlong lyngba ka penalty na u Robert Lewandowski.
Hadien ka jingbym lah ban ïoh jingjop da ar tylli ki klob jong ka Madrid, kiba la ïakhaid da 1-1 kol ha ka sngi Saitjaiñ, ka Barcelona ka la ïaleh katba lah ban ïalehkai bha. Katei ka kynhun ïalehkai jong ka Barcelona ka la shah tam haduh 7 point ha ka Real ha ki lai taïew mynshwa.
Lyngba kane ka jingjop ka Barcelona ka la don lai point na ka bynta ban tam lyngba ka ‘goal average’ ïa ka Madrid.
U Lewandowski u la lah ban thep ïa ka kol kaba 20 kaba la wan urlong lyngba ka penalty ha ka minit kaba 28 bad kane ka la nang pynskhlem ïa ka Barca ban kynjoh sha ka thong.
U nongapkol ka Rayo, Pep Chavarria u la lah ban ïalehkai bha na ka bynta ban kyrda ïa ki kabu ksiar ba la ïoh da ki rangïalehkai shakhmat ka Barcelona. U Jorge de Frutos u la ïoh ïa ka kabu kaba biang bha hynrei um shym la lah ban pynurlong na ka daw ka jingïashan tyngeh ki rangïalehkai ka liang pyrshah.
“Ka la long ka jingtrei shitom jong baroh ki rangïalehkai bad ha kaba kut ngi sngewkmen ba ngi la lah ban pynurlong,” la pynpaw u coach ka Barcelona u Hansi Flick hadien ba la kut ka jingïalehkai.
“Baroh ki sngewkmen ïa ka kyrdan thymmai jong ngi. Nga tharai ba ngi la ïalehkai bha, wat la nga tharai ba ngi lah ban leh ïa kaba kham bha.”
Te kumta ka Barcelona ka la pynjlan ïa ka jingïalehkai ba khlem shah rem sha ka 12 tylli ki jingïalehkai ha u snem 2025, katba ka la pynkut noh ïa ka jingïalehkai ba phylla jong ka Rayo kaba khlem shah rem ha 10 tylli ki jingïalehkai kaba la pynlong pat ban kiew sha ka kyrdan hynriew kaba khlem khmih lynti.
