Shillong, Rymphang 18
Ka wat ba ar jong ka 5th Khelo India Winter Games kaba la thmu ban sdang ha ka sngi Saitjaiñ ha Jammu & Kashmir, la hap ban pynkynriah noh namar ka jingduna hap ïor ha katei ka jaka.
Ïa ki tarik ba la thymmai yn sa pynbha hadien tad haduh ba ka jinglong jingman ka mariang kan long kaba kham biang.
Ka J&K Sports Council ha ka kyrwoh ba la pyllait ha rynsan social media ha ka Lah Sngi U Blei ka la pynpaw. “Ka sien ba san jong ka Khelo India Winter Games ba la buh nyngkong ban long naduh 22 haduh 25 tarik mynta u bnai Rymphang 2025, la pynkynriah noh namar ka jingduna ha ka jinghap ïor. Te kumta yn sa pynbna hadien ïa ki tarik bathymmai tad haduh ba ka jinglong jingman ka mariang kan da long kaba biang.”
Kane ka long ka sien ba ar ïa kane ka lympung la hap ban pynkynriah. Ha u snem ba la dep la hap ban pynkynriah noh ïa ki jingïalehkai sha u Rymphang na u Kyllalyngkot.
Ïa ka wat ba nyngkong jong ka Khelo India Winter Games (KIWG) 2025 la pynlong ha Leh naduh 23 haduh 27 tarik u Kyllalyngkot, ha kaba la lah ban pynlong ïa ki jingïalehkai halor ki jaka ba long thah kum ka ice hockey bad ka ice skating.
