Shillong, Rymphang 18
U President ka National People’s Party (NPP) Meghalaya Unit Bah Prestone Tynsong uba dei ruh u Symbud Myntri Rangbah ka jylla u la kular ba lada ki paidbah ka Mawsynram Konsti-twensi ki pynjop donburom ïa u kyrtong ka NPP u Bah Alvin Sawkmie ha kane ka ilekshon MDC, ka kamram ka Sorkar ban siew kylliang ïa ki paidbah ban kyntiew kyrdan ïa ka Mawsynram Civil Sub Division.
Ïa kine ki kyntien u Bah Prestone Tynsong u la pynpaw haba pan jingkyrshan na ki paidbah ka Mawsynram Konstitwensi ha ka jingïalang ïalap ilekshon ïa u kyrtong ka NPP Bah Alvin Sawkmie ba la pynlong ha shnong Lawbah ha ka 17 tarik mynta u bnai Rymphang 2025.
Ha kane ka sngi la ïadonlang u Bah HM Shangpliang uba dei u MLA barim ka Mawsynram konstitwensi uba dei ruh u nongaiktien ka NPP, Bah Alvin Sawkmie bad ki paidbah kiba wan sngap ïa ka jingpynshai jong ki nongïalam NPP.
U Bah Prestone u la pynpaw haba u la sngap bha ïa ka jingkren u Bah HM Shangpliang u sngew shoh mynsiem bha haba u kren shaphang ka Civil Sub Division, kumta u la ong, lada ki paidbah ki donkam ïa ka Sorkar, ki dei ban pynjop da kaba don burom ïa u kyrtong ka NPP bad ka dei ka kamram jong u ban siew kylliang ïa ki paidbah.
Shuh shuh u la ong ba ka District Council ka long kaba donkam namar lada jia ba duh noh, ka jaidbynriew ruh kan sa duh noh namar kam don shuh ha ka riti synshar ka ri India.
“Balei ngi pynskhem ïa ki rangbah kur, namar don ki nongïalam kiba kwah ban pynkylla jait sha u kpa, da kaba ong ba ka shong ha ka mon jong ki, hynrei shisien ba la don ki rangbah kur kim lah ban leh katba mon,” u la ong.
U la pynpaw ka jingbym sngewïahap namar ki don ki nongïalam kiba pynsngewthuh bakla ïa ki samla ha ka kyrteng ban ieid jaidbynriew hynrei ban ieid jaidbynriew dei ban sdang na la ïing.
Kumjuh ruh ha ka 18 tarik Rymphang 2025 u Conrad K Sangma uba dei u National President ka NPP bad ruh u Myntri Rangbah ka Jylla u la leit pan jingkyrshan na ki paidbah ha ki thaiñ Dangar, Hatmawdon bad sha shnong Mawsynram na bynta ban ïoh jingjop ïa u kyrtong ka NPP Bah Alvin Sawkmie.
