Jowai, Rymphang 18
Katkum ki kaiphot syntiat (intelligence report), u Ma Jesse Suiam u long u briew uba la jop lypa ha kane ka ilekshon MDC, phla u National Secretary jong ka National Peoples’ Party (NPP) u Ma Sniawbhalang Dhar.
U Ma Sniawbhalang uba long ruh u Symbud Myntri Rangbah ka jylla haba ai jingkren ha ka jingïalang ba la pynlong ha ka shnong Tyrshang na bynta u Ma Jesse Suiam uba long u kyrtong jong ka NPP na ka Moodymmai- Nongkhroh Konstitwensi ha ka ilekshon MDC ha ka Sngi Ba-ar u la ong, hynrei kin dang donkam ban trei shitom sa ha ka sngi ba khatduh jong ka jingïalap ilekshon ka 19 tarik khnang ban pynthikna ïa ka jingjop jong u ma Jesse Suiam.
Une u Nongïalam ka NPP bad MLA jong ka Nartiang u la ïathuh ba u ju khmih bniah ïa ka jingtreikam jong u Ma Jesse bad u shem ba u Ma Jesse u la trei shibun bah ki kam lyngba ki kam pynroi bapher bapher ha manla ki shnong ki thaw hapoh ka konstitwensi bad dei halor kane ka nongrim treikam jong u, ka seng ka la ibit ban ai biang ka tiket sha u ban ïakhun ïa kane ka ilekshon MDC.
U Ma Sniawbhalang u la kyntu ïa ki paidbah ba kim dei ban bakla ha ka ban jied ïa u nongmihkhmat na kiwei ki seng bad u la ong ba lada ki paidbah ki jied ïa u Ma Jesse, ki la jied ïa u briew uba don ha ka bor ne ‘double engine’ namar ka NPP ka synshar ïa ka Jylla ruh.
U la ong ba ma u bad u Ma Jesse ki don ka jingïatreilang bad ka jingïasngewthuh kaba jan, kumta ki ïa kit ki ïa bah ïa ka khia ka shon jong ka konstitwensi markylliang bad da kaba ïatreilang.
U la ong ba ki nongthep vote jong ka Moodymmai- Nongkhroh Konstitwensi ki dei ki briew ba stad ba kim pat ju pynrem MDC ïa u da kaba ai nuksa shaphang u Laitsing Shylla uba jop MDC ar sien bad u kyrmen ruh ba u Ma Jesse un jop biang ha kane ka kynti.
Haba kynthoh ïa ki briew kiba kren beiñ ïa ka Sorkar bala ïalam da ka NPP, u Ma Sniawbhalang u la ong ba ki briew ki tynruh shi tynruh ïa ka Sorkar khnang ba kin ïoh eiei na ka Sorkar. U la ong shuh shuh ba kat dang beiñ ki briew katta ka NPP ka nangkiew bad mynta ka la nang bun ki MLA, bad ha ka NPP kam ju don ka jingïaknieh shuki bad ka seng ka don tang ka thong ban wanrah ïa ki jingmyntoi ïa u paidbah.
Haba kynthoh ïa ka VPP, u National Secretary jong ka NPP u la ong ba u President jong ka VPP u Bah Ardent Basaiawmoit u la mad lut baroh ki seng saiñpyrthei bad lehse hadien ka ilekshon un sa shna sa da kawei ka seng saiñpyrthei kaba thymmai.
