Shillong, Rymphang 19
Sa tang shisngi ha shwa ban pynlong ïa ka jingthep vote ïa ki kyrtong ki ban ïakhun ïa ka ilekshon MDC sha ka Khasi Hills Autonomous District Council (KHADC) bad ka Jaiñtia Hills Autonomous District Council (JHADC), la sakhi ba ka jingpynkhreh ïa kane ka ilekshon ka la ïaid shaid-shaid ha kaba ki jingpynkhreh ïa ka ilekshon sha ka KHADC na ka bynta ki 17 tylli ki Konstitwensi ha East Khasi Hills ruh, la sakhi ba ka la long kaba shongshit bad kaba la ïaid bha shakhmat.
Halor kane ka jingpynkhreh ïa ka ilekshon MDC, na ka liang u Additional Deputy Commissioner jong ka East Khasi Hills District, u Bah Ronnie Lyngdoh, u la ïathuh ba ïa ka jingñiew vote na ka bynta 13 tylli ki Konstitwensi yn ñiew ha ISBT, Mawlai-Mawïongrim katba mar ar-tylli ki konstitwensi yn ñiew ha Sohra Civil Sub-divison bad ha Pynursla Civil Sub-division.
“Ka jingpynkhreh ka long kaba janai na ka liang jong ngi ban pynbit-pynbiang nadong-shadong na ka bynta ki nongtrei kiba hap leit sha ka kamram ilekshon sha ki Polling Station bapher-bapher,” la ong u Bah Ronnie.
U la ïathuh ba ha ka Sngi Balang jong ka 19 tarik u Rymphang, 2025, ki nongtrei kiba dei ban leit sha ki kamram ilekshon bad kiba la ïoh ïa ki jingshah hikai pyntbit ban pyndep ïa ka kamram ba ka Sorkar ka la bynshet na ka bynta ban pynïaid ïa ka ilekshon na ka bynta ka Mawsynram, Mawkynrew bad Nongkrem konstitwensi ki la mih ha katei ka sngi ban leit sha la ki Polling Station ban pyndep ïa ka kamram jong ki.
U la ïathuh ba ki nongtrei ba la bynshet ban pynïaid ïa ka ilekshon ha ki 720 tylli ki Polling Station kin sa mih ha ka sngi Palei ka 20 tarik u Rymphang, 2025.
Haba ïadei bad ka Postal Ballot Cell na ka bynta ki nongtrei Sorkar kiba dei ban leit sha ki Polling Station, u la pyntip ba la pynbit-pynbiang ha kaba kitei ki nongtrei Sorkar kiba dei ban leit sha ki Polling Station ki la pyndep lypa ïa ka jingthep vote ban jied ïa ki nongthawaiñ sha ka KHADC. Nalor kata, u la pyntip ruh ba la pynbiang lypa ïa ka Medical Cell ka ban ai jingsumar ïa ki nongtrei lada ki don kano-kano ka jingshitom ha ka bormet ha shwa ba kin leit sha ki Polling Station.
“Ngi la dep ban pynbiang ïa ki kali ki ban leit on ïa ki nongtrei kiba leit sha ki Polling Station bad ban leit buh ruh ïa ki sha ki shnong ba ki shong ki sah ynda ki la leit buh ïa ki EVM Machine ha ka Strong Room khnang ba kan ym don kano-kano ka jingthut ha ka leit ka wan jong ki”, ong u Bah Ronnie.
Halor ka jingpyntreikam ïa ka Model Code of Conduct (MCC) kaba la pyntreikam naduh ka 27 tarik, Kyllalyngkot, 2025 bad ka ban sa kut ha ka 24 tarik Rymphang, 2025, u la ong ba kam shym la don kano- kano ka jingpynkheiñ ïa ka aiñ naduh katei ka sngi ba la pyntreikam ïa ka.
Shuh-shuh, u Bah Ronnie u la pynpaw ruh ïa ka jingsngewnguh ïa ka DC, ki Returning Officer bad ki Assistant Returning Officer kiba peit bad khmih ïa ki 13 tylli konstitwensi hapoh ka East Khasi Hills bad kumjuh ïa ki seng saiñpyrthei halor ka jingïaid beit ïaid ryntih bad kaba ym shym la don kano-kano ka jingpynkheiñ ïa ka Model Code of Conduct.
