Shillong, Rymphang 19
Ka jingïalap ilekshon na ka bynta ban jied thymmai ïa ki MDC sha Khasi Hills Autonomous District Council (KHADC) bad Jaiñtia Hills Autonomous District Council (JHADC) ka la kut noh ha ka por 4 baje janmiet jong ka Sngi Balang, kaba long thik 48 kynta haduh ka sngi ba ki paidbah kin leit ban jied ïa ki nongmihkhmat.
Ka ilekshon MDC sha kine ar tylli ki district council kan long ha ka 21 tarik bad ka jingpynbna ïa ki nongjop kan long ha ka 24 tarik mynta u Rymphang.
Ha kane ka ilekshon MDC ki don haduh 114 ngut ki kyrtong ban ïakhun ha Jaiñtia Hills Autonomous District Council (JHADC), ba kynthup ïa 107 ngut ki shynrang bad 7 ngut ki kynthei, katba ha Khasi Hills Autonomous District Council (KHADC) ki don 158 ngut ki kyrtong, ba kynthup 146 ngut ki shynrang katba ki kynthei ki don 12 ngut.
Ka jingdon ki nong-jied ha Khasi Hills Autonomous District Council (KHADC) ka long 9,96,518 ba kynthup 5,15,257 ki kynthei bad 4,81,268 ngut ki shynrang bad ka konstitwensi kaba heh bad bun tam ki nongjied ka dei ha Mawlai kaba don haduh 49,841 ngut, katba ka konstitwensi kaba rit bad duna duh ki nongjied ka dei ha Jaïaw kaba don 17,148 ngut.
Ha Jaiñtia Hills Autonomous District Council (JHADC) ka jingdon ki nongjied ka long 3,12,300 ngut. Ka konstitwensi kaba bun tam ki nongjied ka dei ka Muthlong-Sohkymphor kaba don 14,167 ngut bad kaba duna duh ka dei ha Sumer kaba don tang 8,305 ngut.
U Chief Secretary, Bah D.P. Wahlang, u la pyntip ruh ba ha ka sngi thep ‘vote’ kin don 10 kynhun ki nongpeit pyrman ki ban ïaid ha kylleng ki jaka na ka bynta ban pynthikna ba ka ilekshon kan long kaba ïaid beit ïaid ryntih.
