Shillong, Rymphang 19
Ka Khasi Students’ Union (KSU) ka la kyntu ïa ka Jaiñtia Hills Autonomous District Council (JHADC) ba kam dei satia ban ai ïa ka No objection Certificate (NoC) sha ka North-East Frontier Railway (NFR) ne sha ka Sorkar Jylla ban pynpoi ïa ka lynti Rel sha ki bynta jong ka Ri-lum Jaiñtia.
“Ka seng ka dawa ïa ka JHADC ba kam dei satia ban ai NoC sha ka NFR ne sha ka Sorkar ban pynpoi ïa ka lynti Rel ha ki bynta jong ka Ri-lum Jaiñtia, katba ka Sorkar kam pat lah ban wanrah ïa ki aiñ kiba khlaiñ ki ban ïada na ka jingwan rung kyrthep ki poi-ei hapoh ka bri u Hynñiewtrep,” ong ka kyrwoh na ka KSU West bad East Jaiñtia Hills District Unit.
Ka seng ka la ong ruh ba kane ka jingpyrshah ka long hadien ba la mih ki khubor ha ki lad pathai khubor ba ka NFR ka don jingthmu biang ban khmih bniah ïa ka lynti shna rel na Bhoksong, Rajagaon, Baithalangso, Jengkha, Kherani, bad Umrangso ka ban kut ha Jowai.
“Ka jingthmu jong ka seng ban pynsngew sha ka JHADC ka long halor ka nongrim ban kyntu ïa ka Council hi baroh kawei ba kan pyrkhat rangbah bad ban ym ai NoC ïa ka NFR kaba dei ban khmih ïa kane ka projek,” ong ka seng. Ka seng ka khmih lynti ba ki nongïalam bad ki nongmihkhmat jong ka JHADC ki dei ban don kajuh ka sur halor ka lynti Rel, ong ka kyrwoh da kaba bynrap ba kan sa aiti ruh ïa ka jingthoh sha ka Sorkar Jylla lyngba u Deputy Commissioner ban pynpaw ïa ka jingpyrshah halor katei ka bynta.
Ka seng lyngba ka kyrwoh ka phah khubor sha ka NFR ba kam dei ban tynruh bad ai ding halor ka lynti rel namar ka seng ka long ba la pynkhreh ban tyngkhuh lada leh da ka bor.
“Ka seng ka ïeng skhem halor kane ka mat – katba ym pat don ki aiñ kiba khlaiñ ban ïada ïa ngi kum ka jaidbynriew ritpaid, ai ba ka jingïakren halor ka lynti Rel kan sangeh shwa. Ka seng, naduh u snem 1988 ka la pyrshah ïa kane ka jingthmu jong ka Sorkar ban ïuhroit ïa ka jaidbynriew bad kan ïai pyrshah katba ka Sorkar kam pat pyrkhat thymmai ban wanrah ïa ki aiñ kiba khlaiñ ban ïada ïa ngi,” ong ka kyrwoh.
Ka KSU ka la pynkynmaw ruh ba ka Sorkar ka la pyrshang ban pyntrei ïa ka projek na Tetelia sha Byrnihat hynrei ka seng ka la pynpulom ïa kane ka jingthmu da kaba pyrshah jur bad pynsangeh ïa kane ka projek ha u snem 2017.
Shuh shuh ka seng ka kyrpad bad wer ïa ki Dorbar Shnong, ïa ki paidbah bad khamtam ïa ki MLA bad MP ba kin ïatreilang halor kane bad bynrap ba ka seng kan nang ïai buddien ïa kane ka kam bad shim ruh ki lad ki lynti ban pynshai sha u paidbah halor ka jingma kiba ap lada wan ka lynti Rel.
“Ka seng ka pynpaw sha ka Sorkar ba kam dei ban im sngi tang ïa ka lynti Rel hynrei to pynleit jingmut bad pynurlong ban wanrah shuwa ïa ka roi ka par sha ki paidbah ka thaiñ naduh ka surok, ka koit ka khiah, ka pule ka dangle bad kumta ter-ter,” la ong ka kyrwoh da kaba bynrap ba ka seng kam kwah ba ka Jaiñtia Hills District kan long ka khyrdop ïa ki bar-jylla kumba la jia ha ka Jylla Assam.
