Ka jingïalap ilekshon jong ki seng saiñ pyrthei bad kumjuh ki kyrtong shimet kiba ïakhun ïa ka ilekshon sha ka Ïingdorbar Thawaiñ jong ka Khasi Hills Autonomous District Council bad Jaiñtia Hills Autonomous District Council ka la poi sha kaba kut. Ki kyrtong ki la leit kylleng ki jaka ha kine ki sngi naduh ba la pynbna ïa ka ilekshon bad ïaid shakhmat ka jingthep kyrteng na ka bynta ban pynsngew ïa la ka nongrim bad ki mat treikam kiba ki don ban tyrwa sha ki paidbah. Don ki kyrtong kiba pynsngew ïa ki mat treikam kiba ki la dep pynkhreh shimet-shimet, bad ki don pat kiba pynsngew ïa ki kular ilekshon bad ki mat treikam kiba la pynkhreh da ka seng kaba ki ïeng ban ïakhun ïa ka ilekshon.
Kaba kham shongshit bad kham pynkhluit ïa ki paidbah ha ka ilekshon ka dei ka kynthoh bad kynnoh markylliang hapdeng ki Nongïalam bad ki seng saiñ pyrthei halor kiba bun ki mat kiba ktah ïa ki paidbah. Don ki nongkren kiba tbit bad kiba nang bha ban pynshai pynsngew ïa ki paidbah ha ka ai jingkren bad ka jingkren jong ki ka rung ha ka jingmut jingpyrkhat jong ki nongsngap. Hynrei ki don pat ki nongkren kiba kren ruma khlem sngewthuh ïa ka phang. Ka jingïalap ilekshon ka dei ban long kaba don nongrim namar kaei kaba ki kdew lyngba ki mat treikam, ka dei na ka bynta san snem, la ka dei ha la kajong ka konstitwensi ne ha ka Jylla baroh kawei.
Lada peit na ka rukom tuid jong ki paidbah sha ki jingïalang ïalap ilekshon, bad ka jingshongshit khlehbiej jong ki, kham duna kiba pynleit jingmut ïa kaei kaba ki kyrtong bad kiwei ki nongai jingkren ki ïalap ha ka jingïalang. Ki seng saiñ pyrthei ki don la ki jong ki mat kular ilekshon (election manifesto) kiba ki la pyllait paidbah. Ki paidbah ki donkam ban tip kiba kumno kita ki mat treikam ba ki seng saiñ pyrthei ki don na ka bynta ban saiñdur bad wanrah ki lad jingïada ba kumno ïa ka jaidbynriew ha ki ar tylli ki Autonomous District Council ha baroh ki liang. Hynrei ka jingshongshit jong ki paidbah ha ka por ilekshon kumba ka paw, kam da dei eh ba ki kmen ne sngewtynnat ïa ki mat treikam kiba la pynsngew da ki seng saiñ pyrthei ne da ki kyrtong. La ïohi ba ka jingshongshit ka dei namar haba ki leit sha ka jingïalang ilekshon ki khmih lynti ban ïoh ei lut nadong-shadong naduh ka bai sngi, bai kali, bai bam, khamtam haba ki don ki kyrtong bad ki seng kiba pyndonkam da ka pisa.
Ka ilekshon ka dei tang ka tamasa synshar paidbah kaba ju pynlong shisien ha ka san snem na ka bynta ban jied ïa ki nongthaw aiñ. Ka 21 tarik Rymphang, 2025 kan dei ka sngi ba ki paidbah ka Jylla kin sa ai ïa ka rai shimet ka jong ki ïano bad kiba kumno ki briew ba kin jied ban leit mihkhmat sha ka Ïingdorbar Thawaiñ bad ka lawei kaba shngaiñ ka don ha ka kti jong ki nongjied lada ki jied ïa ki nongmihkhmat da ka jingkitkhlieh. Ngeit skhem ba kaei kaba ki seng saiñ pyrthei bad ki kyrtong ki la dep ban pynsngew lyngba ki rynsan ïalap ilekshon ha kylleng ki konstitwensi kan long ka jingmyntoi ïa ki paidbah kumno ban jied ïa ki briew kiba dei ban long ki nongïasaid ïa ki jingeh ba ki paidbah ki mad bad kiba shemphang ban thaw ki lad ki lynti ban weng ïa ki jingeh ha kane ka Jylla. Kumta kaba sah mynta, ka long ba kum ki paidbah, ki dei ban da bishar bad puson bniah ïa ki nongrim bad ki jingkular ba la ai da ki kyrtong khnang ba ka jingjied kan nym long lehnohei bad kaba kongsan pat ka long ba kum ki paidbah ki dei ban mih lut na ka bynta ban leit ban pyndep pat ïa ka jingthep ïa la ka shi vote ne ka hok kaba kum u ne ka nongshong shnong ki dei ban pyndep.
