Beirut, Rymphang:
Katkum ki khubor, la ong ba ka por ba la buh naka bynta baroh ki shipai ka Israel ban mih noh na ka thaiñ Shatei Lam Mihngi jong ka Lebanon ka la kut noh ha ka Sngi Ba-ar hapoh ka jingiateh kular ban sangeh iasiat bad ka Hezbollah, katto katne kynta, hadien ba ka Israel, ka la ong, ba ka thmu ban pynsah ia ki shipai jongka ha ki 8 tylli ki bynta ba kongsan naka bynta ka jingshngaiñ jong ka Israel haba iadei bad ki kam thombor bad ki jingleh be-aiñ jong ka Hezbollah. Ki shipai Israel ki la sdang ban mih noh ha ka Sngi Nyngkong na ki katto katne ki shnong khappud jong ka Israel bad Lebanon, katkum ka jingiathuh jong u heh pahara jong ka Lebanon, hynrei ki long kumba ki la pynkhreh ban sah ha ki katto katne ki jaka ba ki la dep thmu lypa.
Ki jaka ba skhem jong ka Hezbollah ha ka phang Shathie bad Mihngi jong ka Lebanon bad ha Shathie jong ka Beirut ki la dep sakhi ïa ka jingshah pynjot kaba jur ha ki ar bnai jong ka thma baroh shisnem bad shisnem jong ka jingïaleh pyrshah ïa ki pud ba la sdang da ka Hezbollah halor ka jingïakynad ha Gaza.
Ki bor synshar ki antad ba ka jinglut ban tei pat ka lah ban poi sha ka $10 billion tam, katba palat 100,000 ngut ki dang sahkut hapoh ka ri, katkum ka jingkheiñ jong ka United Nations.
Wat hapdeng ka jingshah pynjot, da ki hajar ngut ki la ap khmih lynti naduh ka jingsangeh thma ha ka 27 tarik u Naiwieng ban leit phai noh sha la ki ïing- ki sem, ban jurip ïa ki mar ki mata jong ki bad ha ki katto katne ki khep ban wad ïa kiba ïap hapoh ki thliew.
Katto katne ki nongbah bad ki shnong kiba don ha khappud, kynthup ïa ka thaiñ Municipal jong ka Mais al-Jabal, ki la kyntu ia ki nongshong shnong na kitei ki thaiñ kiba la shah pynkynriah jaka, ba kin ap ïa ki shipai Lebanon, ba kin pynïaid hangtei, shwa ba kin wanphai biang, khnang ban pynthikna ïa ka jingwanphai biang jong ki kaba suk ba shngaiñ.
