Vatican City, Rymphang:
Katkum ka kaiphod na ki nongsumar jong ka hospital ba la pynthiah ia u, la ong ba u Pope Francis, uba la thiah hospital ban shah sumar naduh ka taïew ba la dep, u la ioh ia ka jingpang ‘Pneumonia’ ha baroh ar tylli ki tor da kaba bynrap ba utei u rangbah nongialam niam ba la 88 snem ka rta, u don ha ka jingiada jong u mynsiem bakhuid.
U Francis, u la shah sumar ha ka Hospital Gemelli jong ka Rome, ha ka Sngi Thohdieng jong ka taiew ba la dep namar ka jingpang ‘bronchitis’ hynrei ka Vatican ha ka Lah Sngi U Blei ka la pyntip ba ka pynkylla ia ka rukom sumar jong u hadien ba la dep leh ia ki test bathymmai.
Kumta, ha kane ka Sngi Ba-ar pat ka Vatican ka lap ba ka jingpang ba bun jait kaba la wan halor jong ka jingpang tor bad kaba donkam ban pyndonkam da ki dawai pyniap khniang ‘cortisone’ bad kane ka la nang wanrah jingeh ia ka rukom ai jingsumar haba iadei bad kitei ki jingshitom ba utei u nongialam u la don lypa.
U Pope Francis u la shah ot noh ia ka bynta jong u tor sha ka liang kamon ha ka por ba u dang 21 snem ka rta, hadien ba u la ioh ia ka jingpang ‘Pleurisy’ kaba la jan pyniap ia u.
Ka Vatican ka la dep ban pynsangeh noh ïa ka jingïalang jong u Pope ha ka Sngi Saitjaiñ bad ka la ong ba un ym leit shuh sha ka jingïaseng ‘Mass’ kaba ju long man ka Sngi U Blei, wat la kam pat pynbna ïa ki jingthmu na ka bynta ka jingduwai Angelus jong u kaba man ka taïew ba ju long ha ka Sngi U Blei.
U Pope u la pynlut ia ka sngi kaba phra ha katei ka hospital da kaba pynbun ha ki jingduwai bad pule ia ki kot kiba iadei bad ka jinglong ‘riewblei jong u.
