Shillong, Rymphang 19
Ha ka jingpynkhreh ïa ka ilekshon ka ban ïaid beit nadong-shadong sha ka Khasi Hills Autonomous District Council (KHADC) bad ka Jaiñtia Hills Autonomous District Council (JHADC) ka ban sa long ha ka 21 tarik u Rymphang, na ka liang ka Tnat District Council Affairs (DCA) lyngba ka shlem treikam Deputy Commissioner (DC), East Khasi Hills District ka la pyntip ba kane ka ilekshon ka long kaba jai-jai bad kam shym la don kano-kano ka jingujor ba ki kyrtong ne ki seng saiñpyrthei kin pynkheiñ ïa ki kyndon ilekshon (Model Code of Conduct).
Haba ïoh ban ïakren bad u Bah Ronnieson Wahlang MCS, Additional Deputy Commissioner (ADC) East Khasi Hills District, u la pyntip ba ha East Khasi Hills District ki don 17 tylli konstitwensi bad la bynta ïa ki kumba 13 tylli hapoh ka Inter State Bus Terminus (ISBT) Shillong, 2 tylli ha Sohra bad 2 tylli pat ha Pynursla Civil Sub-Division.
“Mynta ka sngi ki ‘polling officers’ na 13 tylli ki ‘polling station’ ki la ïoh ban leit sha ki ‘station’ jong ki, kata 6 tylli kiba ha Mawsynram konstitwensi, 5 tylli ha Mawkynrew konstitwensi, bad 2 tylli kiba hap ha Nongkrem konstitwensi bad kiba dang sah pat ki dang don sa 720 tylli ki polling station ki ban mih lashai ka sngi ka 20 tarik u Rymphang” u la pyntip.
U Bah Wahlang u la ong ba ka jingpynkhreh ka la long kaba janai ban pynsuk ïa baroh ki ‘polling officers’ ha kaba kin mih ryngkat bad ki jingtip ba ki la dep ban ai lyngba ki jinghikai bad kyrmen ba ka jingsuk haba ki leit sha ki polling station kin pyndep ïa la ka kamram ba ka sorkar ka la bynshet ha ki, ba kin long kum kita ki presiding officers, ki 1st, 2nd bad 3rd polling officers.
“Ngi don ïa ki ‘Postal Ballot Cell’ ha kaba ki nongtrei sorkar kiba la shah bynshet kam kin wan ban pyndep ïa la ka kamram bad ka hok jong ki ban jied ïa ki nongthaw aiñ sha ka KHADC bad JHADC” u la ong. Ha kajuh ka por ban peit ïa ki polling officers ba kin ym don kano-kano ka jingshitom lane ka jingpang bad lada ki don kano-kano ka jingthut na ka liang ka tnat ka la dep ban pynkhreh ïa ka ‘medical cell’ ban ïoh khmih bniah khnang ba ki doktor kin ïoh ban ai syrnot ba ki long kiba bit ban leit sha ki polling station ki jong ki.
U Bah Wahlang u la pyntip ba ki bor District ki la dep ban pynbiang ïa ki kali ban leit on bad shaw ïa ki na ki ‘polling station’ bad ha ka 21 tarik ynda ki wan phai bad dep ban buh ïa ki EVM, la pynbeit ruh ïa ki kali ki ban leit on ïa ki sha la ki jong ki shnong khnang ba kan ym don kano-kano ka jingthut ha ka leit ka wan jong ki ruh kumjuh.
Haba jubab halor ka ‘Model Code of Conduct’ ïa kaba la pyntreikam naduh ka 27 tarik u Kyllalyngkot bad ka ban kut ha ka 24 tarik u Rymphang 2025, u la ong ba kam shym la don kano-kano ka jingujor ban pynkheiñ ïa ka ‘Model Code of Conduct’. Nalor kane, u la ong ba u pynpaw ka jingsngewnguh ïa ka DC bad sha baroh ki RO’s jong 13 tylli ki konstitwensi hapoh ka East Khasi Hills District bad ruh ïa ki seng saiñpyrthei namar baroh ki long kiba ïaid beit ïaid ryntih bad kam shym la don kano-kano ka jingpynkheiñ ïa ka jingbthah na ka shlem treikam jong ka DC ha kaba ïadei bad ka ‘Model Code of Conduct’ .
Ha kane ka sngi na ka liang ki polling officers kiba ïadon bynta ban pynïaid beit ïa ka ilekshon ki la ïoh ban pyndep ïa la ka hok ban vote lyngba ka ‘postal ballots’ kaba la pynlong ha ISBT Mawïong.
