Shillong, Rymphang 19 (UNI)
Ka jingïalang ha ka kyrdan jong ka tnat ‘Sector’ hapdeng ka Border Security Force (BSF) bad ka Border Guard Bangladesh (BGB) ka la long ha ka Sngi Balang ban shimkhia halor ki jingeh, ban pynneh-pynsah ïa ka suk ka saiñ, bad ban tehlakam ïa ki kam be-aiñ na shiliang sha shiliang khappud.
Ïa kane ka jingïalang la pynlong hajan ka BOP jong ka BGB, Jawdanga ha Bangladesh mar pyrshah ka BSF BOP ha Durgapara, South West Garo Hills District.
Ïa ka kynhun BSF la ïalam da u Lalit Mohan Sharma, Deputy Inspector General ka BSF, Sector HQ BSF Tura, katba u Colonel Sarker Mohammad Mostafizur Rahman, Sector Commander BGB Mymensingh, Bangladesh u la ïalam ïa ka kynhun shipai ka BGB.
“Ha kane ka jingïalang, ki heh shipai jong baroh ar tylli ki tnat (shipai) khappud ki la ïakren halor ki mat bapher-bapher kiba ïadei bad u pud u sam, kynthup ïa ka ‘Coordinated Border Management Plan’ bad kiwei-kiwei ki kam kiba ïadei bad ïahap lang,” ong uwei u heh BSF.
U la ong ruh ba baroh liang – BSF bad BGB ki la pynpaw ïa ka jingsngewhun halor ka jingïakren kaba kit jingmut bad kaba sngewtynnad, kaba pynpaw ïa ka jingïadei paralok kaba ïajan hapdeng kine ki ar ri.
“Baroh ar ngut ki nongïalam ki la ban biang halor ka jingkular jong ki ban wanrah ïa ka jingshngaiñ bad ka suk ka saiñ ha khappud bad ki la ïaroh ruh ïa ki jingpyrshang kiba dang ïaid shakhmat jong ki shipai jong ki ha ka ban pynneh ïa ka jingsuk ha ka thaiñ,” la ong u heh BSF.
Shuh shuh u la bynrap ba ka jingïalang ka la kut ha ka rukom kaba manbha, ha kaba baroh arliang mamla ki la mynjur ban pynlong ïa kiba kum kine ki jingïalang man ka por hadien-habud ban pyntikna ïa ka jingbteng jong ka jingïatreilang bad ka ïaid beit ïaid ryntih jong ka jingpynïaid kam ha khappud.
