Shillong, Rymphang 19
U Myntri Rangbah ka jylla, Conrad K Sangma ha ka Sngi Balang u la plie ïa ka ‘Apollo Trinity Medical Centre’ ha Shillong kum ka sienjan ba kongsan na ka bynta ka tnat ka koit ka khiah ha ka jylla. Ha kane ka sngi la don lang ruh ka Myntri ka koit ka khiah, Dr. M Ampareen Lyngdoh, u Chief Secretary ka Jylla, Bah D.P Wahlang bad Rana Dasgupta uba dei u Regional CEO – East ka Apollo Hospitals Enterprise Limited.
Haba ai jingkren ha kane ka jingïalang, na ka liang u Conrad u la pynpaw ïa ka jingsngew sarong kaba khraw halor ka jinglah ban pyndep ïa kane ka jaka sumar kaba u la ïa don bynta shimet naduh ba sdang ïa ka. U la pynpaw ruh ba na ka liang ka Sorkar ka don ïa ka jingthmu ban ai ka jingkyrshan pura ha ka liang ka tnat ka koit ka khiah, da kaba kdew ba ka Meghalaya ka la mang haduh 9% na ka mang tyngka sha ka tnat.
U la ban jur ba ka Jylla ka donkam ïa ka jingshakri kaba kham bha ban lap ïa ki jingpang bad pynpaw ïa ka jingkyrmen ba kane ka jaka thymmai kan pynduna ïa ka jingkit kaba khia ha ka liang ka pisa tyngka jong ki nongshong shnong kiba ju leit shabar ka jylla ban ïoh jingsumar.
“Ka tnat ka koit ka khiah ka long kaba kongsan tam ha ka jylla, naduh ka koit ka khïah ha ki nongkyndong haduh ki jingtei kum ki hospital ki la sdang kiew bha. Kane ka jaka kan pyndap ïa kiba bun ki jingduna ha ka rukom sumar bad kan wanrah ïa ka jingsumar kaba paka kaba kham jan sha ki paidbah,” u la ong.
Katba na ka liang ka Dr. Ampareen Lyngdoh ka la pynkynmaw ba ha ki por mynshwa kane ka jaka ka dei ka madan ïalehkai hynrei mynta la pynkylla sha ka jaka sumar kaba paka tam. Ka la pynpaw ïa ka jingdonkam kum kane ka jaka sumar, da kaba kdew ïa ki jingeh ha ka liang ka pisa tyngka haba leit sumar shabar ka jylla. Ka la ban jur ruh ba kane ka jaka bathymmai kan ai jingkyrmen ïa kito kiba donkam bad pyntikna ban ïoh ïa ka jingsumar kaba paka ha jylla.
Na ka liang u Rana Dasgupta u la kular skhem ba na ka liang ka ‘Apollo’ kan ai ïa ka jingsumar kaba paka tam sha ki paidbah ka Jylla. U la pynpaw ruh ba na ka liang ka Apollo kan kham pynleit jingmut halor ki jingpang bym lah ban ïabit (Non-Communicable Diseases) bad ki jingdonkam ha ka ban lap kloi ïa ki jingpang.
Ka ‘Apollo Trinity Medical Centre’ ka wanrah ruh ïa ki lad ai jingsumar ba kham kyrpang, kynthup ïa ka ECG, TMT, echocardiography, pulmonary function tests (PFT), ultrasound, X-ray, dental care, ophthalmology, physiotherapy, bad ka lab ba la pynïasoh bad ka Apollo Diagnostics. Ka tnat Radiology ka don ka jingïasnoh lang bad ka Apollo TeleRadiology International, kaba pyntikna ba kan don ka jingïasyllok bad ki doktor kiba la shemphang.
