Shillong, Rymphang 19
Ka Sorkar Jylla ka la pynkhreh bha ban pynlong ïa ka ilekshon MDC sha ar tylli ki Autonomous District Councils (KHADC & JHADC), kaba ïaid beit ïaid ryntih. Ka ilekshon MDC sha kine ar tylli ki district council kan long ha ka 21 tarik u Rymphang bad ka jingpynbna ïa ki nongjop kan long ha ka 24 tarik jong u juh bnai.
Na ka bynta kane ka ilekshon ka Sorkar ka la kham phai khmat ruh sha ki thaiñ khappud kaba kynthup bad ka Jylla Assam kumjuh ka ri Bangladesh ba kin long kiba ïaid beit khlem ka jingshah pynthut.
Haba kren bad ki lad pathai khubor ha ka Sngi Balang, u Chief Secretary ka Jylla, Bah D.P Wahlang u la ïathuh ba u la dep ïakren bad u Chief Secretary ka Jylla Assam uba la pynthikna ba kan ym don kano-kano ka jingpynthut ïa ki nongleit pynïaid ïa ka ilekshon ha ka thaiñ khappud.
“Nga la ïakren bad u Chief Secretary ka Assam ha kaba ïadei bad ka ilekshon ka ban long ha ka 21 tarik u Rymphang, ngi la ai jingtip shaphang ka jingleit lynti ki nongpynïaid ilekshon, don kiba leit pynïaid ilekshon kiba hap ban ïaid lyngba ka Assam, ngi la pan ka jingïatreilang na ka Jylla Assam, ha kaba u (CS) la pynthikna ba kan ym don kano-kano ka jingpynthut”, la ïathuh u heh ophisar ka Jylla.
Kane ka jingïakren ka Sorkar Meghalaya bad ka Sorkar Assam ka long hadien ba ka la mih ka jingshah khang lynti ïa ki kyrtong ban leit ïalap ilekshon ha katto-katne tylli ki shnong ba don ha khappud bad ka Assam.
Haba kylli, u Bah Wahlang u la ïathuh ba ka jingshah khang lynti ki kyrtong ban leit ïalap ilekshon ha ki jaka khappud ka dei namar ba ki khlem pyntip lypa ïa ki bor ba dei khmih jong ka thaiñ ba kan don ka jingïaid lynti lane ka jingïalap ilekshon, hynrei ha kaba ïadei bad ka jingleit ki nongpynïaid ilekshon u la ïathuh ba la dep pyntip lypa sha ki ophisar ha Assam bad um tharai ba kan dang shuh kano-kano ka jingeh.
Haba kylli halor ka jingbym shym la don ka jingkem pisa, kyiad bad kiwei-kiwei kumba long ha kiwei ki ilekshon, na ka liang u Chief Secretary u la ong ba ka ilekshon sha ki district council ka kham rit, bad kam da don ka jingpynshongshit kum ha ka ilekshon MP bad ilekshon MLA.
“Ngi la buh ïa ki nongpeit pyrman bad ki jaka talasi da ki pulit, ngim ïohi than ban don ka jingpynsawa kumba long ha ka ilekshon MP bad MLA, namar ba ka dei ka ilekshon kaba rit ngi khlem ïoh ban kem pisa ne kyiad. Kawei ruh kiba bun hi ki kyrtong ba ïalap ilekshon ki leit ha ki rynsan ïeng lang (common platform), kaba pynlong ruh ban duna ka jingpynlut”, u la ong. Ha kaba ïadei bad ka jingpynïaid beit ïa ka ilekshon, u Bah Wahlang u la ong ba ka Sorkar ka la lum jingtip na baroh ar tylli ki thaiñ, kata na Khasi Hills bad Jaiñtia Hills, bad ka jingpynkhreh ka long kaba biang, ha kaba la pynbiang ïa ki bor pahara da kaba wanrah ïa ki pulit na Garo Hills, ha kaba la kham shim khia ïa ki jaka thep vote (polling station) kiba lah ban mih jingjia bad kiba suba don jingma.
