Shillong, Rymphang 19
Ka Synod College, ka jaka pule ba pawnam hapoh ka jylla, ka la shah pynkup burom da ka khusnam ‘Skill Development Leadership Award’ kaba donnam ha ka ’33rd edition World HRD Congress 2025′, ha ka jingpynkup burom kaba la long ha Taj Land’s End ha Mumbai, ha kaba u Principal in-charge kane ka kolej Dr M Rani, u la pdiang ïa kane ka khusnam. Ka ‘Skill Development Leadership Award’ ka khusnam na ka bynta ki jaka pule kiba la noh synñiang ha ka jingpynroi ïa ka jingtbit ha ki sap ki phong ba ki khynnah ki don. Ki jaka pule kiba pyni ïa ka jingtreikam kaba kyrpang ha ki bynta kum ka jingleh bha ha ka pule-puthi, ki jinglah ban pynmih kum ki nongïalam, ki prokram ba kyrpang shabar na ka kolej, ka jingpynsngewthuh ïa ka lawei jong ki samla pule, bad kiewi kiwei.
Ka Synod College dang shen ka la shah ithuh kum ka kolej kaba don ha ka kyrdan A+ ba la ai jingithuh da ka NAAC bad dang shen ruh ka la ïoh ruh ïa ka AICP ha ka ’27 International Conference’ kaba la long ha Bali, Indonesia ha ka 7 haduh 8 tarik u Rymphang 2025.
Da ka jingthmu ban wanrah ha khmat ïa ka jingnang jingstad bad ka jingpynroi ha ki sap ki phong jong ki samla pule, ka Synod College ka dang don ruh ïa ka thong ba ha khmat eh ha ka pule puthi bad ban sei ki nongïalam ha ka jylla Meghalaya bad shabar jong ka jylla.
