New Delhi, Rymphang 20
Ka Rekha Gupta kaba dang shu jop ha ka sien ba nyngkong ïa ka ilekshon MLA na ka BJP ka la bam smai kum Myntri Rangbah bathymmai jong ka Delhi ryngkat bad hynriew ngut ki Myntri ha ka Sngi Palei. Ka Rekha Gupta, kaba la jop ïa ka ilekshon MLA na Shalimar Bagh, ka la bam smai ha ka jingïalang kaba la long ha Ramlila Maidan, kata 11 sngi hadien ba ka BJP ka la wan phai biang sha ka bor synshar hadien 26 snem.
Ka Rekha Gupta kaba dei ruh ka President barim jong ka Delhi University Students’ Union (DUSU), ka la kylla long ka kynthei kaba saw ban shimti ïa ka shuki Myntri Rangbah jong ka Delhi, kata hadien ka Sushma Swaraj jong ka BJP, ka Sheila Dikshit jong ka Congress bad ka Atishi jong ka Aam Aadmi Party.
Katkum ka notification jong ka Home Ministry, ka President ka Ri ka Droupadi Murmu ha ka jingai jingmut jong ka Myntri Rangbah ka Rekha Gupta, ka la thung ïa ki hynriew ngut MLA ka BJP, kita u Parvesh Sahib Singh Verma, Ashish Sood, Manjinder Singh Sirsa, Ravinder Indraj Singh, Kapil Mishra bad u Pankaj Kumar Singh kum ki Myntri ha ka Sorkar Delhi.
Ka Rekha Gupta ka la lah ban pynliem noh ïa ka kyrtong ka AAP ka Bandana Kumari da 29,000 vote na Shalimar Bagh ha ka ilekshon ha ka 5 tarik Rymphang. Lah ban pynkynmaw ruh ba ka Rekha Gupta ka la dep ban ïakhun ar sien na Shalimar Bagh kita ha u snem 2015 bad 2020 ha ka ilekshon MLA bad baroh ar sien ka la shah pynliem noh ha ka Bandana Kumari jong ka AAP.
Ïa ka Rekha Gupta la kha ha ka 19 tarik Naitung 1974 ha shnong Nandgarh jong ka Jind district ha Haryana, bad u kpa jong ka u dei uba trei kum u ophisar ha Bank. Ha u snem 1976, ka longïing jong ka Gupta ki la ban sah noh sha Delhi.
Kum ka samla pule ha Delhi University, ka la pynïasoh ïa lade sha ka Akhil Bharatiya Vidyarthi Parishad (ABVP), kaba dei ka student wing jong ka Rashtriya Swayamsevak Sangh (RSS). Ka jinglah jong ka ban ïashim bynta shitrhem ha ka saiñ hima-sima jong ki samla pule, ka la ïalam ïa ka sha ka jingshah jied kum ka President jong ka Delhi University Students’ Union (DUSU) na ka bynta ka samoi treikam ha u snem 1996-1997. Ka la shakri ruh kum ka Secretary jong ka Dyal Singh College bad ka dei kaba la ïadon bynta bha ha ki kam jong ki samla, kaba la lam shaduh ba kan mih syndon shaduh ka bynta ban shakri paidbah.
Ka jingïaid lynti jong ka bad ka BJP ka la sdang ha ki snem 2000. Ka la pynïasoh nyngkong bad ka youth wing jong ka BJP ka Bharatiya Janata Yuva Morcha (BJYM) bad ka la bat ruh ïa ka kyrdan Secretary hapoh ka Delhi unit. Ka la shah thung kum ka National Secretary jong ka BJYM naduh u snem 2004 haduh 2006. Ha u snem 2007, ka la shah jied kum ka Councilor ha ka ilekshon MCD, bad mihkhmat ïa ka North Pitampura Konstitwensi.
Hadien ka jingshah jied, ka la shakri ruh kum ka President jong ka Women’s Welfare and Child Development Committee ha ka MCD naduh u 2007 haduh 2009.
