Shillong, Rymphang 20
Ka Employment Monitoring Cell jong ka Khasi Students’ Union (KSU) ha ka Sngi Balang ka la ïakynduh ïa ka Director General of Police (DGP) ka jylla Kong Idashisha Nongrang ban kyrpad ban khmih biang ïa ka Office Memorandum kaba la pynmih ha ka 1 tarik u Nohprah 2023, kaba ailad ïa baroh ki kyrtong kiba la pyndep (pass) ïa ka Physical Efficiency Test (PET) ban ïaleh sa ïa ka eksamin ka ban long halor ka jingbhah 1:20 katkum ka jinglait kam.
Ha ka shithi ba la aiti sha ka DGP ha ka jingïalang, u Chairman ka Employment Cell ka KSU u samla Rueben Najiar u la ong, “Ngi kyrpad ïa phi ban khmih biang ïa ka Office Memorandum ka tnat Kam Pohïing, ba 1 tarik u Nohprah 2023 kaba don ïa u nombar HPL.231/2023/60”.
Ka Seng ka kyrpad ïa kane halor ka nongrim ba na bynta ki kam (post) bapher bapher hapoh ka tnat Pulit, ym lah ban shu jied tang ïa kiba la wan shakhmat ha ka jingmareh khlem da ailad ne peit ïa ka jingnang jingstad da kaba ailad ban thoh eksamin. Ban ïoh ïa ki briew kiba bit dei ban peit ha man ki bynta bad khlem da ailad ïa ki ban thoh ïa ki eksamin kan long lehnohei.
U la ong ba ka mat kaba ka seng ka kwah ban pynsngew ka long kaba la kdew ha ka Para. 18.1 kaba ong, “Ka jingdon baroh jong ki kyrtong ki ban shah khot ban ïaleh ïa ka eksamin ka dei ban long 20 sien na ka jingdon jong ki kam kiba lait ka ban leit sha ki kyrdan jong ki kyrtong katkum ka Reservation Policy jong ka Sorkar Jylla”.
Na ka liang ka Seng ka la kyrpad ba dei ban ailad ïa baroh ba kin thoh ïa ka eksamin (written examination) hadien ba ki la lah ne shah jied ha ka jingmareh (PET) kumba ki long ha ki snem ba la dep bad ym ban shuh jied katkum ka ratio 1:20.
“Kum kane ka rukom pynïaid ïa ka kam, kan long tang ban ïoh pyndap ïa ka kam ban ïa kaba jied ïa ki kyrtong kiba tbit tam bad ka lah ruh ban lam sha ka jinghiar jong ka kyrdan namar kiba tbit bha ki lah ban shah kyntait noh tang da kaba bud halor ka jingbuh ïa ka Ratio. Ka jingbuh ïa ka Ratio 1:20 ka lah ban long ka bym pat biang na ka bynta ki jinglong jingman baroh bad ki kyrdan kiba la dep ban ai da ka jingpynbna paidbah namar ki post ne kyrdan bapher ha ka kam pulit ki donkam ïa ki sap ki phong kiba ïapher bha,” u la pynpaw.
U la ong ba ka KSU ka pdiang ba ka PET ka long kaba kongsan hapoh ka tnat Pulit hynrei ha kajuh ka por donkam pat ban khmih lang ïa kiwei-kiwei ki bynta ruh.
“Katkum ka memorandum, ki Marks kiba ïoh na ka jingthoh eksamin bad ki Marks kiba ïoh na ka PET ki dei kiba ïapher bak-ly-bak bad ka long ka bynta kaba kongsan bha na ka bynta ban jied ïa ki post ne kyrdan, kum ka nuksa, ha ka kam UB Constable ka marks baroh ha ka PET ka long 100 bad ha ka jingthoh eksamin ka long 300, kumta u briew uba shu ïoh ïa ka marks tang ban shu pass ïa ka PET u lah ban shah jied ban ïaleh ïa ka Personal Interview lada U ne Ka ki leh bha ha ka jingthoh eksamin bad ka jingshisha ka long ba dei ban banjur bha ha kaba ïadei bad ka jingthoh eksamin na ka bynta katei ka post ka pyni ïa ka jingshisha ba ka jingjied ka dei kaba la pynshong nongrim ha ka jingdon ïa ka jingstad bad ïa ka jingdon ïa ka sap, kumta ka jingjied ïa ki kyrtong katkum ka Ratio 1:20 na ka PET ka long ka bym shongnia.”
Ha kane ka jingïakynduh, la ong ba na ka liang jong ka DGP ka la pynshai ba na ka liang jong ka ruh ka sngewïahap ïa kane ka bynta bad ka la don ka jingïakren ban pynkylla ïa kane OM, hynrei ka rai kaba khatduh kan dei hi na ka Sorkar. Ka dang ap ruh ban ïoh ïa ki jinglum jingtip jong baroh kiba lah shah jied ne pass ïa ka jingmareh (PET) bad lada don kiba la pass kiba nym ïoh ban thoh bad ka DGP ka la kular ba kan pyrshang ban ailad ïa baroh kiba la pass ha ka jingmareh (PET) ba ki ïohlad ban thoh ïa ki eksamin ki jong ki. La pynkut ka kyrwoh na ka seng.
