Shillong, Rymphang 20
U Director of School Education & Literacy, Swapnil Tembe u la ong ba ka Sorkar ka la thung ïa ka komiti ha ka kyrdan jong ka DSEL ban pynthikna ïa ka jingpyllait biang por ïa ka tulop sha ki skul bapher-bapher hapoh ka Jylla.
Haba ïakren bad ki lad pathai khubor ha ka Sngi Palei, u Tembe u la ong ba kane ka komti ka la ïakynduh man la u snem ban bishar kam halor ka jingpyllait ïa ka tulop sha baroh ki skul ha ki kyrdan bapher-bapher.
U la pyntip ba haba ïadei bad ki skul Sorkar jong baroh ki kyrdan, ka Sorkar ka la pyllait ïa ka tulop haduh u bnai Kyllalyngkot.
Haba kubur ba ka don ka jingpynslem ïa ka tulop, u Tembe u la ong, “Hooid ki don ki khep kiba mih ki jingthut hangne-hangtai. Ki don ki jingsiew ba leh ‘online’ bad lehse ka lah ban dei ruh namar ki katto-katne ki daw kum ka jingkylla ha ki DDO (Drawing and Disbursing Officer) bad kiwei-kiwei. Ki don bun ki daw bad na kata ka daw katto-katne tylli ki skul ki lah ban khlem pat ïoh ïa ka tulop”.
Une u ophisar u la ong ruh, “Kaba sngewtynnad ka long ba ngi la shong bishar kam man la u bnai. Ngi shong jingïalang man la ka taïew ba nyngkong ban peit ïa ka kam”.
Haba ïadei bad ki skul ba ïarap pisa da ka Sorkar (Aided School), u Tembe u ïathuh ba ïa ka tulop la ju pyllait man ka lai bnai ha kaba u la bynrap ba ka Sorkar ka la dep pyllait haduh u bnai Nohprah.
U Tembe u la ong ba ïa ka bhah ba mynta kaba dei ki lai bnai ba khatduh, ka tnat ka la shim khia kyrpang ban pyllait.
