Ka sngi ka la poi ban jied noh ïa ki dkhot bathymmai sha ar tylli ki Ïingdorbar Thawaiñ kata jong ka Khasi Hills Autonomous District Council (KHADC) bad jong ka Jaiñtia Hills Autonomous District Council (JHADC) kumba la buh da ka Sorkar Jylla. Ka 21 tarik Rymphang, 2025 ka dei ka sngi kaba kyrpang tam ïa ki paidbah nongshong shnong jong ka Rilum Khasi bad Jaiñtia ba kin rai ïano bad kiba kumno ki briew kin phah ban leit mihkhmat sha ka Ïingdorbar Thawaiñ. Ka jingjied ïa ki briew kiba dei ban leit shong dorbar hapoh ka Ïingdorbar Thawaiñ ka dei ka kam kaba iwei-pa-iwei hap ban puson sani shwa ban leit sha ki jaka thep vote.
Ka ilekshon ka dei ka tamasa synshar paidbah kaba ju pynlong shisien manla ka san snem na ka bynta ban jied ïa ki nongthaw aiñ. Ki ar tylli ki Autonomous District Council ki donkam ban ïoh ïa ki ‘riewshemphang ki ban long ki nongïasaid kiba lah ban pynwandur biang ïa ka rukom treikam ha ka synshar paidbah khnang ba ka lawei kan long kaba shngaiñ kumjuh ka ri bad ka jaidbynriew. Ki paidbah nongjied ki don ha ka kti jong ki ïa ka rai kaba kumno kin ai na ka bynta ka lawei. Namarkata donkam ban jied ïa ki nongmihkhmat da ka jingkitkhlieh bad da ka jingpynshong nongrim bha jai. Kaei kaba ki seng saiñ pyrthei bad ki kyrtong ki la dep ban pynsngew lyngba ki rynsan ïalap ilekshon ha kylleng ki jaka kan long ka jingmyntoi ïa ki paidbah namar mynta ki la lah ban pynshong nongrim ha kano ka seng ne kyrtong kin ai ïa ka jingkyrshan jong ki. Donkam ban ïoh ïa ki briew kiba dei ban long ki nongïasaid ïa ki jingeh ba ki paidbah ki mad bad kiba tip ba nang ban thaw lad thaw lynti ban weng ïa ki jingeh ym tang jong ki paidbah hapoh ka konstitwensi, hynrei ïa ki jingeh jong ka rilum Khasi bad Jaiñtia da kaba wanrah ïa ki mat treikam kiba bha bad ai jingmyntoi ïa baroh.
Ki don bun ki seng saiñ pyrthei kiba la pyni ïa ki kular ilekshon bad kaba hakhmat eh kaba baroh ki ïa pyrta ka dei beit ban ïada ïa ka ri bad ka jaidbynriew bad wanrah ki jingkylla. Ka jingkylla kaba ki paidbah ki ap khmih lynti ka dei ka jingthaw lad ïa ki nongshong shnong ban kiew ha ka rukom im bad ka ïoh ka kot. Nalor ka roi ka par kaba donkam ban poi sha ki shnong ki thaw bad ka jingbiang ki lynti syngkieñ, ki paidbah ki donkam ïa ki nongmihkhmat kiba don shibun ki mat treikam khnang ban plielad ïa ki ha ka lad kamai ka ban pynim ja.
Ka pyrkhat ka pyrdaiñ ki briew ha ki por bad ki snem ba la leit noh ka long kaba khlaiñ, bad ki da don ka nongrim kaba skhem. Ki nongthep vote ha kito ki por ki long kiba pyrkhat jngai ha kaba ki briew ki bym don jingnang jingtip kim shlan ban mih shakhmat ban ïakhun ïa ka ilekshon. Dei ki paidbah kiba ïit ïa ki briew kiba don ka jingnang jingtip bad jingshemphang ban mih shakhmat ban ïakhun ilekshon. Ha kane ka juk ba mynta, ha kaba ka jingdon kiba la nang la stad ka la nang bun, ka long ka jinglehraiñ pat lada ki paidbah ki dang jied pynban ïa ki briew kiba kham don pisa ban pynbit pynbiang ha ka por ilekshon.
Kumta ki nongshong shnong ngeit skhem ba ki la dep pynshong nongrim bha ha kine ki khyndiat taïew bad ki la dep lap ïa kita ki briew kiba biang tam eh ban phah sha Ïingdorbar Thawaiñ ka Jylla na ka bynta ban thaw aiñ bad wanrah ki mat treikam kiba long ka jingmyntoi ha bun ki liang ïa ki nongshong shnong ka Jylla.
