Miami, Rymphang:
Haba kren shaphang ki jingïakynad kiba iai bteng ha Middle East bad kumjuh ruh ha Ukraine, U President ba thymmai jong ka America, U Donald Trump, ula maham ba ka thma bah ba lai ka la don hakhmut tang shu bakla, hynrei u la pynksan ba ka jinglong president jong u, kan lah ban tehlakam ïa kita baroh. Haba kren ha ka jingïalang jong ka tnat treikam jong ka lawei ha ka Sngi Palei, u President Trump u la ong ba u trei shitom katba lah ban thaw lad- thaw lynti ban ioh pynkut noh ïa ki thma bad ban wanrah biang ïa ka shongsuk-shongsaiñ ha ka pyrthei baroh kawei namar ba um kwah ban ïohi ba baroh ki ri kin um ha ka thma bah kaba 3.
Namarkata u Trump u la pynpaw ba u la ialeh shitom katba lah ban leit her sha kylleng ka pyrthei bad ban wanrah noh ia ka shongsuk- shongsaiñ ha kane ka sien, khlem da pynslem shuh ioh kan pynpoi pynban shaduh u pud jong ka thma bah kaba lai.
U President ka America u la ai khublei ruh ïa ka Saudi Arabia kaba la pdiang bad kyrshan ïa ka jingïakren hapdeng ka US bad ka Russia ha ka Sngi Balang ha kaba ïadei bad ka thma Ukraine bad u la ong ba katei ka jingiakren ha katei ka sngi, ka long u mawjam uba khraw ia ka Ukraine bad ia ka jingsuk ha ka pyrthei baroh kawei.
U la ther ruh ïa u President ka Ukraine, u Volodymyr Zelensky, da kaba khot ïa u, “u nongpynshutia’ bad “u nongsynshar donbor ba khlem ilekshon,” kaba pyni ïa ka jingkylla jong ka United States, kaba kyrshan ïa ka Moscow ha ka jingïakynad hapdeng ka Russia bad ka Ukraine.
Kane ka la jia katto katne kynta hadien ba u Trump bad u Zelensky ki la ïakren lyngba ki rynsan ‘Social Media’, ha kaba u President ka Ukraine u la ong ba u paralok jong u na America u im hapdeng ka jingbym tikna bad ka US ha kine ki sngi, ka la leit ai jingkyrshan bakla pynban ia ka Russia, kaba long ka nong pynjot dusmon bad ka nongleit thombor be-aiñ pyrshah ia ka ri Ukraine.
