Shillong, Rymphang 20
Ka Inter-State Youth Exchange Programme ba san sngi ba la pynlong da ka Nehru Yuva Kendra Shillong bad ki nongïashim bynta na Mizoram kaba la sdang naduh ka 16 tarik mynta u bnai, ka la kut noh ha ka 20 tarik ha Youth Hostel Shillong.
Ha kane ka sngi kut jong ka Inter-State Youth Exchange Programme, la sakhi ka jingïa pyni ïa la ki kam, ki jingnang jingstad bad Yoga hapdeng ki nongïashim bynta.
Ha ka sngi pynkut jong ka Inter-State Youth Exchange Programme, la wan sakhi ruh da u Director ka tnat Community and Rural Development ka Sorkar Meghalaya u Sibhi Chakravarthy kum ka Kongsan.
Haba kren ha kane ka sngi, u Sibhi Chakravarthy u la ïaroh ïa ka NYKS kaba pynlong ïa kum kine ki prokram, da kaba kdew ba ki ailad kiba kordor ïa ki samla ban mad bad sngewthuh ïa ka kolshor bad ka rukom im jong kiwei pat ki jaidbynriew.
U la pynksan ïa ka jingïatylli ha ka jingpher bad ka jingdonkam jong kum kine ki prokram ha kaba pynroi ïa ka jingsngewthuh kaba kham jylliew hapdeng ki jaidbynriew bapher bapher ha kylleng ka ri India.
U la pynshlur ruh ïa ki samla ban wad bniah ïalade bad ban pyndonkam hok ïa ki lad ki lynti kiba la ai da kum kine ki prokram ïakylliang ban sngewthuh ïa ki jingïapher bad jingïasyriem hapdeng ki Jylla.
Ka Inter-State Youth Exchange Programme ka pynïasoh lang da kaba jop ïa ki samla na ki jaidbynriew bapher bapher, ka la pynroi ïa ka jingburom markylliang bad ka jingsngewthuh jingmut ha ka kolshor, bad ka la noh synñiang sha ka mynsiem jong ka jingïatylli jong ka jaidbynriew.
