Shillong, Rymphang 20
Ka tnat Social Welfare jong ka Sorkar Jylla hapoh ka Drug Reduction Elimination & Action Mission (DREAM) ka la pan jingïatreilang na ki Nongïalam Niam na ka bynta ban ïakhun pyrshah ïa u drok bad ha ka Sngi Palei la lum ïa ka jingïalang bad ki kynhun hapoh ka All Faith Forum.
Haba kren hadien ka jingïalang, u Myntri ba khmih ïa ka tnat Social Welfare, Bah Paul Lyngdoh u la ong ba ka Sorkar ka la mang lypa T.50 lak, hynrei ka shong ha ka jingdonkam jong ki kynhun namar ba ka Sorkar kan ïarap da ka pisa bad ki tiar donkam bad kan pynbiang ruh ïa ki nongïasyllok bad kiba la ngop ha u drok.
Haba pan ïa ka jingïatreilang na ki paidbah, u Myntri u la ong ba ka jingïatreilang ka dei u shabi ban jop ïa ka thma pyrshah ïa u drok.
U la ong ba ka jingïakren bad ki Nongïalam Niam ka long ban pynsngew sha ki ïa ka jingdonkam ban ïatreilang, ha kaba la batai ha ki ba kumno ba kin aplai ïa ki jingïarap na ka Sorkar na ka bynta ban ïakhun lang ïa u drok.
U la ong ba nalor ka jingïarap na ki kynhun bapher bapher ka Sorkar ka la pynkhreh ruh ban thied ïa ki kor kiba lah ban ksam bad ïohi lyngba ki kali kiba rung ba mih ha ka Jylla khnang ban lap ïa kiba kit drok. U la ong ba kawei ka kor ksam yn buh ha khyrdop ban rung sha ka Jylla ha Ribhoi District, katba kawei pat la thmu ban buh ha ka thaiñ Ratacherra, East Jaiñtia Hills District.
Shuh shuh u la ïathuh ba la mynjur ban wanrah 10 tylli ki ksew sma dien (Sniffer Dog) ban don lang ruh ki nonghikai pyntbit.
“Ka Sorkar ka la nang pynkhlaiñ ruh ïa ka jingkem drok ha ki jaka rung bad jaka mih ha Jylla da kaba pyntreikam ïa ki ‘Scanner Vehicle’ bad ki ksew sma” u la ong. U la pyntip ruh ba ka Sorkar ka la pynim biang ïa ki ‘Village Defence Party’ (VDP) ban pynkhlaiñ ïa ka jingtreikam jong ki Dorbar Shnong ha ka jingïakhun pyrshah ïa u drok. “Ka Sorkar ka la pynkiew ruh ïa ka jingsiew ba man u bnai sha ki dkhot VDP na ka T.800 sha kaT.3000 nalor ki tiar kiba kham bha” u la ong.
Na ka liang u Bah F.G Kharshiing, Mission Director ka DREAM, u la ong ba ki nongïalam niam ki don ka bynta kaba kongsan ban pynsaphriang ïa ka jingtip bad btin lynti ïa ki paidbah ha ka jingïakhun pyrshah ïa ka jingdih drok.
