Imphal, Rymphang:
Ha ka jingpynkhreh kaba jur ban ïakhun pyrshah ïa ki kam pyntriem jong ki lehnoh, ki bor pahara ki la kem ïa uwei u dkhot jong ka kynhun United Kuki National Army (UKNA) ha ka 18 tarik, Rymphang. Une ba la shahkem la tip kyrteng kum u Seiminlen Doungel (35) jong ka shnong Tuibong kaba hap hapoh ka CCP-PS, Churachandpur distrik, uba u la shah kynnoh ba u la donkti ha ki kam dawa pisa, ka jingshalan ïa ki tiar siat, ka jingkhaïi drok ha ki bynta khappud jong ka Indo-Myanmar ha ka kyrteng jong ka kynhun UKNA.
Ki bor pynïaid ki la ïoh kurup ïa ki katto katne ki tiar kiba long beaiñ na u Doungel, kynthup ïa ki kot ki sla kiba bun jait, ki Card bank, bad kawei ka Mobile Phone. Nalor kata, la kurup ruh ïa ki tiar siat, kiba kynthup ïa kawei ka suloi AK-47 kaba don ïa u kuli Magazine, kawei ka suloi .315 (ba la suba ba la lute na ka dukan suloi), kawei pat ka suloi .315 kaba don ïa u Magazine, kawei ka suloi kaba la shna da ka ri kaba don tang kawei ka ktang, bad 23 tylli ki song kuli mm2.
Ha kajuh ka por, ki bor pahara ki la pynlong ïa ki jingkhynra kiba jur ha ki jaka ba rit paid jong ki lum bad ki wah ban tehlakam ïa ki kam pyntriem jong ki lehnoh. Ha kane ka jingkhynra ha ka shnong Irong kaba hap hapoh ka Nongpok Sekmai-PS, Thoubal distrik, ki bor pahara ki la ïoh kurup ïa ki tiar ïaleh kiba bun bha, ha kaba ki kynthup ïa kawei ka suloi SLR kaba don Magazine, kawei ka suloi 5.56, saw tylli ki bom kawang kti kiba heh bha ki High Explosive (HE), uwei u bom kawang kti ka China, 5 tylli ki song ki kuli ba 7.62 mm, ki bom pynsat khmat, ki bom kawang kti pynsat khmat bad ar tylli ki Baofeng radio set ryngkat bad ki tiar pyndonkam.
