Shillong, Rymphang 20
U Myntri ba khmih ïa ka kam Jngohkai hapoh ka Jylla, Bah Paul Lyngdoh u la ong ba ka Sorkar kan pynlut na ka bynta ban kyntiew ïa ka kam jngohkai, ha kaba la mang T.4000 klur na ka bynta ki projek bapher-bapher na ka bynta ban wanrah ïa ka jingkylla kaba khraw ha ki kam jngohkai pyrthei ha Meghalaya.
Haba ïakren bad ki lad pathai khubor ha ka Sngi Palei, u Myntri u la ong ba ka jingpynlut kaba bun kan long sha ki jingtei bad yn pynlut bun ruh ha ki jaka jngohkai kiba kham khring kum ka Umïam, Sohra, New Shillong, Dawki bad sha ki thaiñ Garo Hills.
Haba kylli, u Bah Paul u la ong ba kane ka T.4000 klur ka kynthup lang ïa ka pisa na ka Sorkar Pdeng bad ka Sorkar Jylla.
“Ki don katto-katne kiba la mang pisa beit na ka Sorkar Jylla bad ki don ruh kiba la mang ha ka jingpynlut kaba long 90:10 bad ka Ministry of Tourism bad katto-katne pat na ki Externally Aided Project (EAP)”, u la ïathuh.
Haba kylli shuh shuh, u Bah Paul u la ïathuh ka jingmang pisa kam dei tang jong kawei ka snem mang tyngka, namar kan shimpor kumba 2 snem ban pyndep ïa baroh kine ki projek.
“Katto-katne ki projek kin shim por namar ka aïom treikam ha Meghalaya. Ki lah ban shimpor palat ïa kawei ka snem mang tyngka”, u la ong.
Katkum ka jingong u Myntri, kine ki projek kin dei ki kam ki ban wanrah ïa ka jingkylla kaba khraw ha ka kam jngohkai ka Jylla.
“Ka Dawki ka dei kawei na ki jaka kaba khring bha ïa ki nongleit shangkai haba phai sha ki kam jngohkai bad ka khaïi-pateng, hynrei haduh mynta ngim don satia ïa ki ïingbasa kiba biang kumta shisien ba ngi la pynbiang ïa ki ïingbasa ha kum kine ki jaka, ki briew kiba wan ki lah ruh ban sah bad pynlut kham bun ka por”, u la ong.
U Bah Paul u la ong ruh ba da ka jingpynheh ïa ka surokbah (Highway) sha kaba kham heh lane ka surok ‘fourlane’, kan nang kyntiew shuh-shuh ïa ka kam jngohkai bad ka khaïi pateng ha ka thaiñ.
