Shillong, Rymphang 20
Ka Sorkar Jylla kan sa sdang noh shen ïa kawei pat ka kylla ha ka jingthung kam ïa kumba 1000 ngut ki nonghikai ha ki skul Lower Primary, Upper Primary bad Secondary, hadien ba la dep pynkhreh bad mynjur ïa ka ‘Roster’.
Haba pyntip ïa kane ha ka Sngi Palei, u Director of School Education & Literacy, Swapnil Tembe u la ong ba ïa mynta ka dang don ha ka jingbishar ïa ka ‘roster’, bad hadien ba la dep mynjur yn sa lah ban pynïaid shakhmat ïa ka jingthung kam nonghikai.
“Kum ha kajuh ka kyrdan, ngi la pynkhreh sa kawei pat ka kylla ban thung kam ïa ki nonghikai ha ki kyrdan bapher-bapher jong ki skul Sorkar”, u la ong.
Katkum ka jingong une u ophisar, ki don kumba 500 tylli ki kam nonghikai ba lait thylli ha ki skul Lower Primary jong ka Sorkar, 10-20 tylli ki kam ba lait ha ki Upper Primary bad kumba 200-300 tylli ki kam hikai ha ki skul Secondary.
U Tembe u la ong ruh ba ki don ki kyndon ban thung kam ïa ki nonghikai ba la pynap lypa (substitute teacher) ha ki kam ba lait ha ki skul Secondary ban pynthikna ba ki khynnah skul kin ym shah ktah.
Ha kaba ïadei bad kiwei pat ki skul, u Swapnil Tembe u la ong ba ka rukom pynshong nongrim ïa ki skul ka long kaba kongsan bha ïa ka Jylla.
“Ngi la leh ïa kane ka kam bad hadien ba ngi la pyndep, baroh ki kam kiba lait ngin sa thung kam noh”, la ong une u ophisar, bad u la pyntip ruh ba ha u snem 2023, ka Sorkar Jylla ka la thung kam ïa palat 1000 ngut ki nonghikai.
