Delhi, Rymphang 20
U Myntri ka tnat Kam Pohïing bad Cooperation jong ka Sorkar Pdeng, Amit Shah, u la ïashim bynta ha ka prokram ‘Unity Utsav – One Voice, One Nation’ ba la pynlong da ka Assam Rifles ha New Delhi ha ka Sngi Palei kum kongsan. Bun ki kynrem ki lyndan ba kynthup ïa u Director General of Assam Rifles ki la ïadonlang ha kane ka jingïalang.
Ha ka jingai jingkren jong u, u Myntri Kam Pohïing Amit Shah u la ong ba ka kyntien jingïatylli ka long kaba kongsan bha ïa ka thaiñ shatei lam-mihngi (NE). La bun bun snem hadien ba la ïoh ïa ka jinglaitluid, ka jaka ba bun jong ka thaiñ shatei lam-mihngi la pynjngai ha ka jingsngew bad ka jinglong na Delhi. U la ong ba u Myntri Rangbahduh Narendra Modi u la pynduh ïa kane ka jingjngai hapdeng ka thaiñ shatei lam-mihngi bad ka Delhi lyngba ka lad jingpynïasoh. Mynta ka thaiñ shatei lam-mihngi ka dei jong ka India baroh kawei bad ka India baroh kawei ka dei jong ka thaiñ shatei lam-mihngi.
U Shah u la ong ba ka Sorkar Modi ka la kyntiew da ki spah ki lad mang tyngka na ka bynta ka thaiñ shatei lam-mihngi bad ka la ai palat lai-saw shah ka jingmang tyngka ïa ka thaiñ shatei lam-mihngi. U la ong ba shwa u 2027, yn pynïasoh ïa baroh 8 tylli ki jylla ka thaiñ shatei lam-mihngi bad ka Delhi lyngba ka lynti rel bad liengsuiñ.
U Myntri Kam Pohïing u la ong ba u Myntri Rangbahduh Modi u la kyntiew ïa ka thaiñ shatei lam-mihngi ha kylleng ka ri kum ka Ashtalakshmi bad baroh 8 tylli ki jylla jong ka thaiñ ki don ka bor ban kyntiew ïa ka ri ha man ka bynta. U la ong ba ki don bun ki lad na ka bynta ki samla jong ka thaiñ shatei lam-mihngi ha ka liang ka ïoh ka kot, ka deiriti, ka jingshngaiñ, kam ïalehkai bad jingwad bniah bad ka roi ka par. U la bynrap ba ka Sorkar Modi ka la plie shibun ki lad ïa ka thaiñ shatei lam-mihngi ha man ka kam, naduh ka kam jngohkai haduh ka teknoloji, kam ïalehkai haduh kam haw-haw, kam rep haduh ka jingseng kam lajong bad ki kam bank bad kam khaïi pateng.
U Amit Shah u la ong palat 220 tylli ki kynhun tynrai bad palat 160 ki jaidbynriew riewlum kiba shong ba sah ha ka thaiñ shatei lam-mihngi, la kren palat 200 tylli ki jait ktien, ki don palat 50 tylli ki tamasa ba kyrpang ba ju rakhe bad palat 30 tylli ki jingshad tynrai bad palat 100 tylli ki jait bam ba don ha ka thaiñ. U la ong ba kane baroh ka dei ka jingriewspah ka hiar pateng na ka bynta ka ri India baroh kawei, kaba sngew sarong ïa la ka jong ka hiar pateng. U Shah u la ong ba ka India khlem ka thaiñ shatei lam-mihngi bad ka thaiñ shatei lam-mihngi khlem ka India kam long kaba pura.
U la ong ba ka phang pdeng jong ka tamasa North-East Unity ka dei ka ‘one voice, one nation’. U la ong, “Ka ri jong ngi ka dei ka jingïakhleh lang shibun ki ktien, ki deiriti, ka bam bad ka riam ka beit bad kane ka jingïatylli hapdeng ka jingïar ka dei kaba kyrpang bad ka bor kaba khraw ïa ka ri jong ngi. Lyngba ka Unity Utsav kaba 5 sngi, la pyni ïa ka jingïatylli jong ka thaiñ shatei lam-mihngi ha Delhi.”
U Shah u la ong ba ka Assam Rifles ka dei ka kynhun shipai kaba la rim tam jong ka ri bad la ithuh ïa kane ka kynhun shipai kum ka ‘Paralok jong ka thaiñ shatei lam-mihngi’. U la ong ba ka Assam Rifles ka don ka bynta ba kongsan ban pyllait ïa ka thaiñ shatei lam-mihngi na ki jingeh ba bun. U la ong ba lyngba kane ka prokram, mynta ka Assam Rifles ka la jop ha ka jingpyni ïa ka jingïatylli bad ka bor jong ka deiriti jong ka thaiñ shatei lam-mihngi sha ka ri baroh kawei bad ka pyrthei.
U la ong ba ki jingjia ïaumsnam bad ki jingkhlad jong ki shipai ka la duna da 70 persen bad ka jingkhlad ki riew paidbah da 85 persen ha ka thaiñ shatei lam-mihngi. U la ong ba kane ka jingduna ha ki jingjia ïaumsnam ka pyni ba mynta ka don ka shongsuk shongsaiñ ha ka thaiñ shatei lam-mihngi bad ka juk ba thymmai jong ka roi ka par bad ka jingkiew ka deiriti ka la sdang.
