Agartala, Rymphang:
Ka jingwan buhai shnong sha India na shiliang u pud u sam ka pyrthei ka la sakhi ïa ka jinghiar kaba jur bha hadien ka jingkhyllem jong ka sorkar Sheikh Hasina ha Bangladesh, la kam u Director General Border Security Force (BSF) u Daljit Singh Chowdhury. Ïa kane ka jingkren u la pynpaw ha ka sien kaba 55 jong ka jingïakren kaba man la ka ar snem ha ka kyrdan jong u Director General hapdeng ki shipai BSF bad ki shipai pahara khappud Bangladesh (BGB) kaba la long ha nongbah New Delhi.
Ha kane ka jingïakren, u Director General ka BGB u Major General Mohammad Ashrafuzzaman Siddiqui u la pyrshah ïa ki khubor ha kaba ïadei bad ki kam thombor ïa ki jaidbynriew rit paid ha Bangladesh, da kaba ong ba kum kine ki jingkynnoh ki long kiba la pynheh. “Ngi la ïoh jingujor ba ki don ki jaitbynriew rit paid kiba sngew tieng, hynrei ka BGB ka la pynthikna ïa ki ïa baroh ki jingïarap kiba lah ban ai. Ka sorkar Bangladesh ka la shim ïa ki sienjam kiba thikna ban pynthikna ïa ka jingshngaiñ jong ki,” la ban jur u Siddiqui.
Ka mat ba kongsan kaba la ïakren ha kane ka jingïalang ka long ban pynïeng ïa ki jingker sainar (barbed-wire fencing) ha ki katto katne ki bynta jong ka khappud India bad Bangladesh, ha kaba kane ka kynhun na Bangladesh ka la pynpaw ïa ka jingpyrshah. “Ki don katto katne ki mat jingïakynad ha kaba ïadei bad ka jingker kynroh. Hynrei ngi don ka jingkyrmen ba kine ki jingeh kin sa lah ban pynbeit noh shen”, la ong une u heh ka BGB.
