Mawkyrwat, Rymphang 28
Ka jingthep ‘vote’ ha Mawkyrwat bad Langrin konstitwensi na ka bynta ka ilekshon MDC ban jied ïa ki nongmihkhmat sha ka Khasi Hills Autonomous District Council (KHADC) ka la kut noh ha ryngkat ka jingïaid beit ïaid ryntih khlem kano-kano ka jingthut, kaba la sdang naduh ka por 7 baje mynstep bad kut noh ha ka por 4 baje janmiet.
Ka jingpoi jong ki nongthep ‘vote’ ha Mawkyrwat konstitwensi ka long 80% katba ha Langrin konstitwensi ka long 83%.
Na ka liang u Deputy Commissioner jong ka South West Khasi Hills District, Bah B. Mawlong u la ïathuh ba ka jingthep ‘vote’ ha Mawkyrwat bad Langrin konstitwensi ka long kaba jop bad kam shym don kano-kano ka jingpynthut ne jingpynwit.
U la ïathuh ruh ba ka jingpoi jong ki nongthep ‘vote’ ha Mawkyrwat konstitwensi ka long 31,702 na ka 39,530 ngut ka jingdon ki nongthep ‘vote’ katba ha Langrin konstitwensi ka jingpoi ki nongthep ‘vote’ ka long 30,255 na ka 36,160.
