Khliehriat, Rymphang 21
Ka jaka thep ‘vote’ ha ka shnong Tangnub, East Jaiñtia Hills District ka la thylli bad ym don mano-mano ba ïashim bynta ha ka ilekshon MDC sha ka Jaiñtia Hills Autonomous District Council (JHADC) ha ka 21 tarik Rymphang.
Ka khubor ka ïathuh ba ki paidbah ki la sangeh ban ïashim bynta ban thep ‘vote’ namarba ka JHADC ka la leh kuman ïa ka jingdawa jong ki ban pynneh ïa ka shnong Tangnub ha ka konstitwensi kaba ki don baroh shi katta sha ka Sutnga Nongkhlieh konstitwensi.
Lah ban pynkynmaw ba ki nongshong shnong ka Tangnub ha ka 10 tarik Kyllalyngkot, 2025, ki la leit tur paidbah sha ophis jong ka JHADC ban pynpaw ïa ka jingpyrshah halor ka jingpynkynriah ïa ki na ka Sutnga Nongkhlieh konstitwensi sha ka Saipung Nongkhlieh konstitwensi ha ka jingpynbeit konstitwensi thymmai jong ka JHADC. Ha kane ka jingtur paidbah ki nongshong shnong ki la rai ban ‘Boycott’ ne kyntait shim bynta ha ka ilekshon MDC.
