Washington, United States:
U Elon Musk u la ther pyrshah ïa u Volodymyr Zelensky ha ka Sngi Palei, da kaba ong ba ki nong Ukraine ki la pyrshah mynta ïa ki jingleh bad ki rai jong u President jong ki bad ba u nongïalam jong ka US, U Donald Trump, u dei hok ban iehnoh ïa u, na ka jingïakren bad ka Russia, kaba thmu ban pynkut noh ïa ka thma Ukraine.
Katei ka jingkynthoh jong utei riewstad ha ka liang ka tech, u ba ialam ia ka jingpynkylla kaba khraw ia ka sorkar US jong u Trump, ka la mih ha ka por ba ka White House, ka ong ia u Zelensky, ba un sangeh noh ia ki jingkren beiñ pyrshah ia u Trump bad ban soi ia ka soskular marpoh khyndew bad ka United States kumba la tyrwa da ka US.
Kumta la ong ba utei u heh jong ka SpaceX bad ka Tesla, u Musk, u la pynmih ïa ka jingkren beiñ pyrshah ïa u Zelensky, ha ka rynsan X jong u, da kaba kynnoh ïa utei u nong-ialam ka Ukraine khlem ki sakhi ba u pynïaid ïa ka mashin bamsap kaba heh bha, ka ba pyn-um ïa ki met ïap jong ki shipai Ukraine.
U Musk, u la pynpaw da ka sur kaba kham jem ha ka jingïalang jong ki nongïalam jong ka CPAC, kaba la long ha ka Sngi Palei, da kaba ong ba u Trump u shim-khia haduh katta katta halor ka thma Ukraine.
U Zelensky u la shah jied ha u snem 2019 na ka bynta san snem hynrei ka Ukraine ka la pynkynriah noh ïa ka ilekshon namar ka aiñ shipai kaba la pynjari hadien ka jingwan hiar thma jong ka Russia ha u snem 2022 ïa ka ri marjan jongka kaba kyrshan ïa ka Ri Sepngi.
