Shillong, Rymphang 21
U kyrtong ka Voice of the People Party (VPP) na Jaïaw-Mawprem konstitwensi, Bah Denzil R. Chen u la ong ba kum u kyrtong ka seng u don ïa ka jingkyrmen ba lyngba ka jingtrei shitom ha kine ki sngi baroh kiba la dep, u don ïa ka jingkyrmen ba un lah ban poi sha ka thong jong ka jingjop ha kane ka kynti.
Na ka liang U Nongsaiñ Hima haba ïoh ban ïakren bad u Bah Denzil ha ka jingwan thep vote sha Polling Station, u la ong ba u don ïa ka jingkyrmen ba ka seng VPP kan lah ban jop ha kiba bun tylli ki konstitwensi ha kane ka ilekshon bad ong ba la sakhi ruh ba ka lyer jong u Prah ka beh bha ha kylleng-kylleng ki jaka da kaba kyrmen ba kane ka lyer jong u Prah kan sar ha kiba bun ki jaka.
“Nga kyrmen ba lyngba ka jingtrei shitom bad ka jingpynkhreh katba lah, lehse ha kane ka kynti kaba mynta ngin lah ban ïoh ïa ka jingjop. Ka lyer jong u Prah ka la beh kham eh hi mynta bad ngi ngeit skhem ba ngin poi sha ka jingjop ha baroh ki konstitwensi”, ong u Bah Denzyl.
Haba kylli pat halor ka jingshah kawang ktieh jong ka seng VPP na ka por sha ka por ha ki sengsaiñ pyrthei, u Bah Denzyl u la ong ba kita kiba kawang ktieh ai kin kawang namar ha ka jingïaleh ïa ki ilekshon, ka jingkawang ktieh ka ju mih hi hynrei kum ka seng kan ïaid beit ha la ka jong ka lynti ban poi sha ka thong.
“Kiba kawang ktieh ai ki mat kawang hynrei ngin ïaid beit ha la ka jong ka lynti ban poi sha thong bad ngin ïaleh ban ïoh ïa kata ka jingthmu ban pynurlong”, ong u Bah Denzyl.
