Delhi, Rymphang 21
Ka sienjam kaba khraw la buh ban shim da ka tnat ïalehkai jong ka ri India ban pynthikna ïa ka jingjied kaba hok ïa ki nongïalehkai ha kylleng ki jait jingïalehkai.
Ha ka jingpyrshang ban pynbeit ïa ka jingeh kaba ju jia man ka por jong ki jingïalehkai ha ri India, ka tnat ïalehkai kan pynbor ïa ki jingpyrshang kiba la ring da ki dur khih ha ka jingdon lang jong u nongpeit pyrman ha kylleng ki jait jingïalehkai. Kane ka jingleh, ka tnat ka kyrmen, kan pynthikna ba ym don iwei ruh nongïa-lehkai ban sngewsih ne sngew ba u la shah leh shiliang ha ka por ba jied. “Baroh ki jingpyrshang jied yn pynlong hapoh ka jingpeit bniah da ka durkhih ban pynthikna ïa ka jingshai bad ka jinglong hok. Phin sa ïohi ïa ka jingkulmar ha ki jingïa-lehkai kan duna lyngba kine ki jingpyrshang,” la ong ka tyllong khubor na ka tnat. Ka jingkhihwin kaba la kdew ka dei ka jingïakynad kaba ju pynjynjar ïa ki rukom jied ha ka ri. Ki nongïalehkai na ki jingïalehkai ba heh kum ka jingsiat bad ka jingïa-lehkai ïalympat ki la ujor ha ki ïing bishar madan shwa ka Olympics ha u snem ba la dep hadien ba ki la ujor ïa ka jingleh shiliang khmat bad ki rukom treikam bym shai.
“Ki jingpyrshang jied (naduh mynta) kin don ki nongpeit pyrman ruh kumjuh. Ki ophisar jong ka Ministry bad Sports Authority of India (SAI) kin don lang ha ka por ba pynlong ïa ka jingïalehkai bad ïa kane yn pyntreikam ha kylleng ki jait jingïa-lehkai,” ong ka tyllong khubor.
“Tang ka jinglah ban lehkai bha ka dei ban long kaba kongsan. Ka rai ka dei ban long katkum ka jinglah. Ki synjuk kim lah ban leh katba ki kwah ha ka kyrteng jong ka jing-synshar hi,” la bynrap shuh-shuh ka tyllong khubor.
Ka synjuk siat suloi jong ka ri ka la long napdeng ki kynhun kiba la ïoh ïa ka jingshah kynthoh kaba jur namar ba kam don ïa ka kpait saiñ kam (policy) jied kaba thikna ha u snem ba la dep.
Ki nongïalehkai ïaly-mpat ka ri India ki la shah rong noh ha ka jingeh namar ba ka synjuk ïalehkai jong ka ri kam don ïa ka jingithuh jong ka tnat.
Ki la dep shah pynbor ban weng noh na kawei ka lympung ïalehkai pynïakop kyrdan bad ka jingïashim bynta jong ki ha ki lympung ki ban sa wan ruh ka long kaba khlem thikna namar ka jingmudui ha ka ïingbishar kaba dang ïaid shakhmat pyrshah ïa ka Wrestling Federation of India.
Ka tnat ka leh katba lah ban pynthikna ba ka jinglong jingman jong kane ka jingeh kaba dang bteng kan kut noh bad kan ym ktah shuh ïa ki nongïalehkai.
