Shillong, Rymphang 21
Ki ar kol ba la thep da u Paulo Dybala ki la biang pura ïa ka AS Roma ban jam sha ka pre-quarter final ha ka Europa League, kumjuh ka Ajax ka la lah ban pynurlong wat la ka la hap ban ïalehkai tang shiphew ngut ki ‘rangïalehkai na ka bynta 95 minit.
Ka Porto, kaba la ïakhaid mar 1-1 kol ha ka wat kaba nyngkong ha la ïing, ka la ïoh ban lam-khmat lyngba u ‘rangïalehkai na Spain u Samu Aghehowa (27), hynrei hadien shiteng kynta lyngba ka jingïalehkai stet u Dybala ka la pynlong ïa u ban pynphai kylla ar kol ha ka minit kaba 35 bad 39.
Katei ka kynhun ïalehkai na Portugal ka la hap ban ïalehkai sa tang shiphew ngut ki ‘rangïa-lehkai na ka daw ba u ‘rangïalehkai shapdeng na Canada u Stephen Eusta-quio u la ïohpdiang ‘red card’ tang mar ïa sdang ka kylla miet.
Ka Roma ka la thep biang sa shi kol lyngba u Niccolo Pisilli (83) shwa ba u Devyne Rensch (90+6) un ïarap pynthep shi kol na ka bynta ka Porto, hynrei ka Roma ka la tam da 4-3 lyngba ka aggregate bad ban jam sha kawei pat ka wat.
Haba phai sha ka Ajax ka la lait da ka said ban jam sha ka pre-quarter wat la ka la shah rem ha ka kynhun ïalehkai na Belgi-um ka Union Saint-Gilloise da 2-1 kol, hynrei ka la tam da 3-2 lyngba ka aggregate hadien ba ka lah ban ïalehkai bha ha ka wat kaba nyngkong.
Katei ka kynhun ïalehkai na Belgium ka la wanphai da ka jingkhlaiñ bor ha kaba u Kevin Mac Allister (16) u la pynkhih jar nyngkong bad ïa ka kol ba ar la thep da u Promise David (28) lyngba ka penalty hadien ba u kapten ka Ajax u Davy Klaassen u la ïohpdiang da ka ‘red card’ na ka daw ba u la pyndei da ka bol hapoh box ha ka minit kaba 25.
Ha shwa ban wai ka jingïalehkai u Kenneth Taylor u la lah ban pynphai kylla shi kol lyngba ka penalty ha ka minit kaba 93 jong ka jingpynjlan por tam na ka bynta ban pynlong ïa ka Ajax ban tam da 3-2 lyngba ka aggregate.
Kumjuh ka Real Sociedad ka la ïoh jaka sha ka pre-quarter final hadien ba ka la lah ban pynliem noh ïa ka Midtjylland da 5-2 kol ha San Sebastian na ka bynta ban tam da 7-3 lyngba ka aggregate.
