Shillong, Rymphang 21
Ka tnad District Council Affairs (DCA) jong ka Jylla ha ka Sngi Thohdieng ka la pynbna ban pynlong biang ïa ka jingthep ‘vote’ ha 4 tylli ki jaka thep ‘vote’ ne ‘Polling Station’ ha ki 2 tylli ki konstitwensi ba hapoh East Jaiñtia Hills hadien ka jingshah pynjulor jong ki kor ‘Electronic Voting Machine’ (EVM) ha kitei ki jaka.
Kane ka jingthep ‘vote’ kan long biang ha ka 22 tarik Rymphang, 2025 naduh ka por 7 baje mynstep haduh 4 baje janmiet.
“Ha ka ilekshon sha ka Khasi Hills Autono-mous District Council (KHADC), ha baroh ki distrik kam shym la don kano-kano ka kaiphod ba ïadei bad kino-kino ki jingjia ne jingkulmar, ne kiwei-kiwei,” ong u Commissioner & Secre-tary ka tnad DCA, Bah C.V.D. Diengdoh haba kren sha ki lad pathai khubor.
Haba phai pat ha ka ilekshon sha ka Jaiñtia Hills Autonomous District Council (JHADC), u Bah Diengdoh u la ong ba ki la don katto-katne ki jingjia khamtam ha East Jaiñtia Hills.
“Ngi la ïohpdiang ïa ki kaiphod na u DC bad RO ba ha ki 2 tylli ki jaka thep ‘vote’ jong ka 22-Musniang Rangad konstitwensi ba kynthup ïa ka 7-Wapungskur (Male) and 8-Wapungskur (Female), ki la don ki kaiphod ba u paidbhur u bym ithuh satia u la rung ha ka jaka thep ‘vote’ bad pynjulor ïa baroh 2 tylli ki kor EVM ha kine 2 tylli ki jaka thep ‘vote’,” u la ong.
U Bah Diengdoh u la ong ruh ba ka tnad ka la ïohpdiang sa ïa kawei pat ka jingpyntip na kane kajuh ka distrik ha kaba ka kynhun ki briew bym ithuh satia ka la rung ha jaka thep ‘vote’ bad pynpra ïa ki kor EVM.
Kane ka la jia ha ki 2 tylli ki jaka thep ‘vote’ jong ka 29 – Bataw-Lakadong konstitwensi ba kynthup ïa ka 7-Bataw A (Male) bad ka 8-Bataw B (Female).
Haba kdew ïa ka kyndon ba kyrpang, ka 143-B, une u heh ophisar u la ong ba lada don kano-kano ka jingkulmar bad ka jingjulor ïa ka kor EVM, lah ban pynlong biang ïa ka jingthep ‘vote’ khnang ban ïoh ïa ka ilekshon kaba khuid ba suba bad kaba ïaid beit ïaid ryntih.
“Ngi la pynmih hukum ban pynlong biang ïa ka jingthep ‘vote’ lashai ka sngi naduh ka por 7 baje mynstep haduh 4 baje janmiet ha kine ki 4 tylli ki jaka thep ‘vote’ jong kitei ki 2 tylli ki konstitwensi,” u la ong.
Haba kylli, u Bah Diengdoh u la ong, “Ki daw ba tikna kiba la pynlong ïa u paidbhur ban wan pynkulmar…ngin dang hap ban tohkit shuh-shuh ïa kane.”
U la ong ruh ba ki bor distrik ki la shimkhia mardor bad kam shym la don kano-kano ka jingmynsaw bad baroh ki don hapdeng ka jingshngaiñ lait noh tang ki kor EVM kiba la shah pynjulor.
Shuh shuh haba ïadei bad ka jingthep ‘vote’ ka ban sa long biang ha ka Sngi Saitjaiñ ha kitei 4 tylli ki jaka thep ‘vote’, u Commissioner & Secretary u la bynrap ba u DC bad SP ki la khmih bniah ïa ki lad jingpynkhreh bad ban pynkhlaiñ ruh ïa ki bor pahara.
“Ngin sa phah shuh ïa ki kynhun pahara kumjuh ïa ki Majistor. U DC u la shim ïa baroh ki sienjam ba donkam ban pyntikna shuh ïa ki bor pahara ha ryngkat ki kynhun bathymmai (Polling Party) ki ban phah sha kine ki jaka thep ‘vote’ khnang ban wanrah biang ïa ka jingshaniah. Ka jingkyrpad na ka tnad ka long ba ki briew ki dei ban tip ba kan don biang ka jingthep ‘vote’ bad baroh ki dei ban mih bad thep ïa ka ‘vote’,” u la ong.
Ha kawei pat ka liang, haba phai sha ka jingwan poi jong ki nongthep ‘vote’ ha KHADC ka long 72.45% katba ha JHADC ka long 70.99% haduh ka por 3 baje nohphai sngi.
