Shillong, Rymphang 21
U kyrtong ka Congress na Malki-Laitumkhrah, Bah Manuel Badwar ha ka Sngi Thohdieng u la pynpaw ka jingkyrmen skhem ban poi sha ka thong ha kane ka kynti namaba ki briew ki dang phai khmat sha ka seng.
“Nga la wan sha ki jaka thep ‘vote’ bapher-bapher, ki paidbah ki la nang bun, nga kyrmen hi ba ki Khasi kin mih kham bun ha kane ka kynti,” ong u Bah Badwar haba kren sha ki lad pathai khubor hadien ka jingthep ‘vote’.
Haba ban jur halor ka jingdonkam ban wanrah jingkylla ha ka rukom treikam, bad ka jingpynkhlaiñ ïa ka District Council (DC), u la ong ba kane ka dei ka thong kaba nyngkong eh jong ka seng naba ka DC ka dang donkam ban treikam kham bniah, ym kumba long shuh ha ki por mynshuwa.
“Nga don ka jingsngewskhem ba kat shaba nga ïaid, bun ki briew ki ong ba na ka Congress lei ki la nang bun kiba dang kham khynnah kiba mih. Nga sngewthuh ba ka jingkyrshan na ki kyrdan ba sha trai ka don, namarba ki briew ki dang peit hi ïa ka Congress,” u la ong.
Ha kajuh ka por, haba pynsngew halor ka jingmih noh jong ki nongïalam ka seng ha ki por ba la dep, u Bah Badwar u la ong, “Haba ki nongïalam kim skhem ka jingmut-jingpyrkhat bad kim skhem ka nongrim te kin phet, hynrei ka bha hi pat teng-teng ïoh wan ki nongïalam bathymmai.”
“Ngin ïa ïeng rasong, ngin pynkhlaiñ namarba ha kaba kut hi ngi ïa ïeng ïa ka nongrim jong ki paidbah bad khamtam ïa ka nongrim jong ki Khasi. Ban da poi sha ka thong lei, kan poi sha kaba bha hi na bynta ka jaidbynriew baroh kawei,” u la ong.
Haba kylli, u la ong ba na ka liang ka District Council ka lah ban leh shibun kiei-kiei haba ïadei bad ka ïoh ka kot bad ka kam ka jam.
“La bun bah ki karkhana kiba la dep plie ha ka Jylla, hynrei haduh mynta ïa kine ki karkhana ngim pat tehlakam. Ngi ju ïohi ba ki Khasi bapli ki trei ïa ki kam kiba rit bad kim ïoh ïa ki kam ba-heh kum ki kam ‘Management’, ki shu ïoh tang ban sar phyllaw, ban ai sha…kato te kam long. Ngin hap tehlakam bad shna ïa ki aiñ kiba kham pher,” u la ong. Haba phai sha ki karkhana kiba la don lypa hapoh ka Jylla, u Bah Badwar u la ong ba yn hap ban khot bad pynsngew sha ki ba ki Khasi ki dei ban ïoh ïa ki kam ha ki tnad treikam bapher-bapher bad ha ki kyrdan ba halor.
U la ong ruh ba ka District Council ka bun palat ki aiñ kiba lah ban kham pynskhem ban kyntiew ïa ka jaidbynriew. Haba jubab halor ka jingkyrmen jong u ïa ka Congress, u la bynrap, “Ha kane ka kynti mynta ngan da peit, ka don ka jingkyrmen ba kham bun, hynrei ngim tip kaei ka ban jia.”
Shuh shuh u la bynrap, “Ka jingkyrmen jong ngi ka long ba ka jingïoh ‘vote’ jong ka Congress ka dei ban kiew bad lada kane ka kylla sha ka ‘seat’ kan bha. Hynrei na ki nongthep ‘vote’ hi ki dang don hi ka jingkyrmen ha ka Congress.”
