Jowai, Rymphang 21
Ka jingthep ‘vote’ sha ka Ïing Dorbar Thawaiñ jong ka Jaiñtia Hills Autonomous District Council (JHADC) ha ka Sngi Thohdieng ha ki ‘Polling Station’ jong ka West Jaiñtia Hills District kiba don ha ki thaiñ khappud bad ka West Karbi Anglong District bad Dima Hasao District jong ka Jylla ki la ïaid beit ïaid ryntih bad la wan ïashim bynta ryntih da ki nongshong shnong jong kitei thaiñ khappud.
Ka jingthep ‘vote’ ha ki artylli ki ‘Polling Station’ jong ka shnong Mukroh kaba hap hapoh Barato-Mukroh konstitwensi bad kaba don markhap ba ka West-Karbi Anglong District ka poi haduh 1427 ‘vote’ na ka 1672 ‘vote’.
Katba ha ka shnong Saba kaba hap hapoh Barato-Mukroh konstitwensi bad kaba don markhap bad ka West Karbi Anglong District ka jingthep ‘vote’ ka la poi sha ka 550 na ka 630.
Ka jingthep ‘vote’ ha ka shnong Tum Tum kaba hap hapoh Barato-Mukroh konstitwensi bad kham pajih na ka West Karbi Anglong District ka long kaba shitrhem bha haba ka jingthep ‘vote’ ka la kut kumba san baje janmiet eiei haba 1861 ngut kynthei bad shynrang ki la wan thep ‘vote’ na ka 2119 ‘vote’. Kane ka ‘Polling Station’ ka dei na bynta ka shnong Tum Tum, ka Myntangtihwieh bad ka Pdienlapatien kaba sha shiliang ka Wah Myntang bad ka Khatkasla, ka Psiar bad ka Mowluber kiba don shah shiliang ka Wah Myntang.
Ka jingthep ‘vote’ ha shnong Saphai kaba hap ha Saphai Sahsniang konstitwensi bad markhap ka Dima Hasao District, Assam, ka long kaba ishongkun ha kaba 1572 ngut ki la wan thep ‘vote’ na ka 1953 ngut ki nongthep ‘vote’.
Ka jingthep ‘vote’ ha ka shnong Khanduli hapoh Mynsngat Khanduli konstitwensi bad markhap ka West Karbi Anglong District ka la kut ha ka por ba la buh bad ka jingthep ‘vote’ ka la poi sha ka 1695 na ka 2070 ngut.
Ha kawei pat ka liang, ki Pnar na ki Shnong Pnar hapoh Block-I, ki la ïohlad ban wan thep ‘vote’ suk khlem kano-kano jingpynthut hadien ka jingshimkhia jong ki bor pynïaid distrik jong ka West Jaiñtia Hills District bad ka jingïatrei bor bah jong ka West Karbi Anglong District kiba la pynbiang bor pahara na ka bynta ban pynsuk ka leit ka wan jong ki Pnar na Block-I sha ki shnong ha West Jaiñtia Hills District.
