Guwahati, Rymphang:
Shisngi hadien ba u MP ka Congress u Rakibul Hussain bad ki PSO jong u ki la shah thombor ha ki briew ki bym lah ban ithuh ha Nagaon distrik jong ka Assam, u Myntri Rangbah ka jylla Assam u Himanta Biswa Sarma ha ka Sngi Thohdieng u la ong ba ki pulit ki la ithuh ïa ki briew kiba donkti ha kane ka kam thombor kumba la kynnoh.
U la buh ruh ïa ki kyrteng jong ki briew kiba donkti ban thombor ïa u Rakibul Hussain.
“Ki pulit ki la ithuh ïa ki briew kiba donkti ha kane ka jingjia ba la kynnoh ba ki la thombor ïa u MP ka Congress u Sri Rakibul Hussain”, la buh jingthoh u Himanta Biswa Sarma ha ka lad pathai khubor.
U Sarma u la jer kyrteng ïa ki shiphew ngut kiba la shah kynnoh ha ka khubor jong u. Kine ki kyrteng ki kynthup, ïa u Harun jong ka Jamtola, u Haresh jong ka Fakoli, u Basir jong ka Tamulitup, u Kasem Ali jong ka Kawoimari, u Rosidul jong ka Kawoimar, u Ayub Gunabari
Lutkior jong ka Rail station, u Khaleque jong ka Rowmari, u Mojibur jong ka Gorematikhowa bad u Jahangir jong ka Koachgaon.
U Myntri Rangbah u la ong ba ki pulit kin leh ïa kaba donkam pyrshah ïa ki briew kiba la ithuh katkum ka aiñ.
Ha ka sngi Palei, u Rakibul Hussain u la shah thombor ha ka kynhun ki briew ryngkat bad ki bat kriket ha Nagaon distrik jong ka Assam katba u dang shong ha kawei ka kali ar shaka kaba leit ban leit sha ka jingïalang jong ka seng ha ka shnong Gunomari kaba hap hapoh jong ka Rupohi Police Station.
Kitei ki nongthombor ki la tap ïa ka khmat jong ki da ka jaiñ kaba ïong bad ki dang pyrta pyrshah ïa u MP. Ki Personal Security Ophisar (PSO) jong utei u nongïalam ka Congress ki la pyrshang ban ïada ïa u Rakibul Hussain da kaba siat hynrei ki la shah thombor ha ki paidbhur ruh kumjuh.
U DGP u Harmeet Singh u la ïathuh ha ka lad pathai khubor ba u Hussain um shym la mynsaw satia, watla arngut ki PSO jong u ki la mynsaw malu mala.
La rah ïa u Hussain sha ka hospital bad la ai jingsumar ïa u, katba ki bor pulit ki la pynpra ïa ki paidbah ha katei ka jaka. Hadien kane u MP ka Congress u la leit sha ka jingïalang jong ka seng kaba la buh por ha ka jingïadonlang u heh pulit jong ka distrik.
U Myntri Rangbah u Sarma u la hukum ban pynjur ïa ka jingpahara ïa u MP ka Congress katba u dang don hapoh ka distrik, khamtam eh ha ki thaiñ Samaguri bad Rupohihat.
