Shillong, Rymphang 21
U President ka National People’s Party (NPP) Meghalaya uba dei ruh u Symbud Myntri Rangbah ka Jylla, Bah Prestone Tynsong, u la pynpaw ïa ka jingsngewskhem ba ka NPP kan ïoh ïa ka jingjop ha kane ka ilekshon MDC sha Khasi Hills Autonomous District Council (KHADC) bad Jaiñtia Hills Autonomous District Council (JHADC).
Haba kren bad ki lad pathai khubor hadien ba la pyndep ïa ka jingthep vote, u Bah Prestone u la ong ba kum u Nongïalam ka seng, bad ha ka jingïaid kylleng ki jaka hapoh Khasi bad Jaiñtia Hills la ïohi ba ka jingkyrmen ka don ha man la kawei-pa-kawei ka konstitwensi, lait noh ha ki katto-katne kaba don ka jingïakhun kaba jwat.
“Kumta, ngi sngewskhem ba ngin jop ïa ka ilekshon ha baroh kine ki ADC”, u la ong.
U Nongïalam ka NPP u la ong ruh ba ka seng ka la kut jingmut ban shakri ïa ki paidbah bad ïa ka Jylla lyngba ki lai tylli ki ADC lada ki paidbah ki ai ïa ka rai jong ki na ka bynta ki kyrtong ba ka seng ka la pynïeng.
U Bah Prestone u la ong shuh shuh ba ka seng ka la leit rung ha man la ki shnong ban pynsngew ïa ki kam pynroi bapher-bapher bad ka jingkongsan ban don ïa u MDC u ban ïarap lem ïa ka Sorkar ha ka ban wanrah ïa ka roi ka par ha baroh ki liang.
U la ong ruh ba ka jingleit sha kawei-pa-kawei ka konstitwensi ka long ban pan jingkyrshan na ka bynta ban nang pynkhlaiñ shuh-shuh ïa ki ADC ba kin ai ka jingïada ïa ka jaidbynriew.
U Bah Prestone uba la mihkhmat haduh san sien kynthih ïa ka Pynursla konstitwensi u la pynpaw ruh ïa ka jingsngewskhem ba u Bah Rahboklang Tynsong uba dei u pyrsa jong u uba ïakhun na Langkyrdem-Laitkroh bad ka MDC na Nongshken, Kong Grace Mary Kharpuri kin ïoh ïa ka jingjop ha kane ka ilekshon.
Ha kaba ïadei bad ka jingbym shym la pynmih jong ka seng ïa ki kular treikam (manifesto) shwa jong ka ilekshon kumba la leh da kiwei ki seng saiñpyrthei, u Nongïalam ka NPP u la ong ba ka seng kam sngew donkam ban kular eiei sha ki paidbah ha kane ka ilekshon, namar ki district council ki la don lypa shibun ki kam ba hap ban leh, bad kaba donkam mynta ka long ban leit sha ki district council ban trei na ka bynta ka jingmyntoi jong ki nongshong shnong trai ri.
