Nongpoh, Rymphang 21
Ka jingthep ‘vote’ ban jied ïa ki nongmihkhmat sha ka Khasi Hills Autonomous District Council (KHADC) ha baroh 5 tylli ki konstitwensi ka Ri-Bhoi District ka long kaba ïaid beit ïaid ryntih khlem kino-kino ki jingpynthut, hynrei ka jingmih jong ki paidbah ka long kaba duna bad kam long kaba shongshit haba nujor bad ki ilekshon ha ki por kiba la dep.
Katkum ka kaiphod ba la ïoh na ka ophis jong u Deputy Commissioner ka Ri-Bhoi District, ka jingpoi jong ki nongthep ‘vote’ haduh ka por 4 baje janmiet ha Jirang ka long 20,096 (51.46%), Nongpoh 20,716 (55.98%), Mawhati 21,672 (56.07%), Umsning 20,660 (54.50%) bad ha Umroi ka jingpoi ki nongthep ‘vote’ ka long 23,427 (67.61%).
Haba kheiñ kyllum pat ïa baroh 5 tylli ki konstitwensi, ka jingpoi ki nongthep ‘vote’ ka long 1,06,571 (56.91%) kat haduh ba thoh ïa kane ka khubor.
Kumban shu kdew, ki don haduh 26 ngut ki kyrtong na ki seng saiñ pyrthei bapher-bapher ba kynthup ruh ïa u kyrtong shimet, kiba la mih ban aireng ha kitei ki 5 tylli ki konstitwensi jong ka Ri-Bhoi kiba ap kmang ïa ka risol jong kane ka ilekshon ka ban sa pynbna paidbah ha ha ka 24 tarik mynta u bnai Rymphang ïano ki paidbah ki i-bit ban long kum kita ki nongmihkhmat ki jong ki.
