Shillong, Rymphang 21
U Chief Executive Member (CEM) ka Khasi Hills Autonomous District Council (KHADC) uba dei ruh u kyrtong ka NPP na Nongthymmai, Bah Pynïaid Sing Syiem, u la ong ba u President ka Voice of the People Party (VPP), Bah Ardent M Basaïawmoit u la ïalam bakla halor ka Article 371.
Haba kren ha ka Sngi Thohdieng hadien ba la pyndep ïa ka jingthep vote, u la ong ba lada ki briew na kiwei ki Jylla ki bym don ïa ka Khyrnit ba Hynriew, ki ïakhun mynta bad shah jingit, kumno kan lah ban long ba ka Jylla Meghalaya kaba la don lypa ïa ka jingïada na ka Khyrnit ba Hynriew kam sngewthuh ïa ka bor jong ka.
“Ha ki snem ba la leit, ngi la shah ïalam bakla ha u President ka VPP ha kaba u la kam ba ka jingdawa ïa ka Article 371 kan ym ïalam sha ka jingpynduh noh ïa ka Khyrnit ba Hynriew. Hynrei, hadien ba la pule bha ïa baroh ar, ngi shem ba ka Khyrnit ba Hynriew ka kham khlaiñ ban ïa ka Article 371, namar ka ai ka jingïada bad tyngkai ïa ka riti ka dustur ba riewspah jong ngi”, u la ong.
Haba pynpaw ïa ka jingsngewskhem ban jop ha ka ilekshon, u Bah Pynïaid u la ong ba ka jingïaid lynti jong u ban shakri ïa ki paidbah ka Nongthymmai ka la sdang.
“Ngi sngewskhem ba ki paidbah kin vote ïa ka NPP haba pynshong nongrim ïa ki jingpyrshang jong ngi ban nang pynkhlaiñ ïa ka Khyrnit ba Hynriew bad ban leh eiei halor ki mat kiba kongsan. Nalor kane, ngi la lah ban mynjur ïa bun ki bill ba kongsan ban ïada ïa ka jaidbynriew bad ngi pynthikna ruh ïa ka roi ka par jong ki konstitwensi”, u la ong.
U Bah Pynïaid u la pynpaw ruh ïa ka jingdonkam ban leh eiei halor ka jingkyrduh um ba la mad da ki paidbah ka konstitwensi, nalor ka jingwad ïa ki lad ki lynti ban weng ïa ka jingeh ha ka jingbym ïoh kam ïoh jam da kaba buh ïa ki ‘coaching centre’, ka ‘vocational training’, ‘skill development’ bad ruh ban buh ïa ka ‘rehabilitation centre’ ban sumar ïa kiba la ngop ha u drok. Haba ban jur ïa ka jingdonkam ban kyntiew ïa ki kam ïalehkai, u Bah Pynïaid u la ong ba un sa tyrwa ban shna ïa artylli ki madan hapoh ka Nongthymmai konstitwensi ban ai jingmyntoi ïa ki khynnah bad ki samla ba don sap, kumjuh ruh ïa ka jingdonkam ban pynjanai ïa ki jaka ai jingsumar.
