Paris, Rymphang:
U President jong ka France, Emmanuel Macron ha ka Sngi Thohdieng u la ong ba ka France ka la rung sha ka juk ba thymmai bad ba u thmu ban ïathuh ha u President jong ka United States, Donald Trump ba um lah ban long uba tlot ne pynjem hakhmat u President ka Russia, u Vladimir Putin.
U Macron u la ïakren bad ki nong France ha shwa ban leit jngoh ïa ka White House ban ïakynduh ïa u Trump ha u bnai ban wan, katba ka Europe ka dang shem jingeh ban jubab ïa ka jingjubab jong u sha Ukraine.
U Trump un sa iakynduh ha Washington bad u Macron ha ka Sngi Nyngkong bad u Myntri Rangbahduh ka UK- u Keir Starmer ha ka Sngi Palei jong kane ka taïew ban wan, ong ka White House.
U Trump, u la pynkyndit ia ki ri jong ka dewbah Europe baroh kawei hadien ba u la pynbna ba u long ba la kloi ban sdang leit iakren biang bad u Putin na ka bynta ban pynkut noh ïa ka thma kaba la neh mynta la lai snem hapdeng ka Russia bad ka Ukraine.
Ha kine ki sngi ba la dep ki heh sorkar jong ka France ki la ong ba ki paidbah jong ka France ki donkam ban sngewthuh ia ka jingkhraw jong ka jingma kaba wan na ka Russia.
U Macron u la ong ha ki nongthoh khubor ha kaba sdang jong kane ka taiew ba ka Russia ka buh jingma ïa ka jingim jong ki nong Europe bad kumta ka US ka dei ban sngewthuh shai ia ka jingma jong ka Russia, ym ban leit ai jingkyrshan ia ka.
Kumta ha ka Sngi Palei, utei u President jong ka France u la ong ba ka France ka donkam ban pynkhlaiñ ïa ka jingïada hapdeng ka jingkylla ka kpait saiñ kam (policy) kaba kyndit ha ka jingïadei hapdeng ka US bad ka Russia.
U Macron u la ban jur ruh ba um shym la thmu ban phah shipai sha Ukraine hynrei u la pyni ba ka France ka dang pyrkhat ban ai jingkular ïa ka jingïada na ka bynta ka Ukraine hadien ka jingïateh kular ban sangeh thma bad ka Russia.
U Macron u la ong ruh ba u thmu ban ïakren bad u President ka Ukraine, U Volodymyr Zelensky shen ha kine ki khyndiat sngi ban wan naka bynta ki jingdonkam bad ki jingeh jong ka Ukraine ha ka liang ka jingai jingiada ia u paidbah bad ia u pud- u sam jong ka.
