Shillong, Rymphang 21
U kyrtong ka Hill State People’s Democratic Party (HSPDP) ba aireng na ka Mawkhar-Pynthorumkhrah konstitwensi, Bah Jubanlang Kharbihkhiew, u la ong ba ha ka jingïalap ilekshon la sakhi ba wat la ki paidbah ka konstitwensi ki kham duna ban wan sngap ïa ki jingïalang jong ki kyrtong hynrei katkum ka jingsngewthuh ka long ba ki paidbah ka konstitwensi ki la mih shakhmat ha kane ka sngi thep vote da ka jingangnud ban thep ïa ki vote jong ki khnang ban wanrah noh ïa ki jingkylla.
Haba ïoh ban ïakren bad u Bah Jubanlang Kharbihkhiew, u la ong ba wat la ka jingmih ki paidbah ha kane ka ilekshon MDC ban thep ïa ki vote jong ki ka long kaba duna bha hynrei da ka jingkyrmen skhem pat, u la ong ba ka jingjop ki kyrtong na ka seng HSPDP kan long kaba bun.
“Nga ïohi ka jingmih ki paidbah ka dang duna bha hynrei kam lei-lei namar ba ka jingjop kan long kaba kham bun na ka bynta ka seng HSPDP”, ong u Bah Jubanlang.
U la ong ba u don ïa ka jingkyrmen ba u lah ban poi sha ka thong jong ka jingjop bad ong ruh ba u don ïa ka jingkyrmen kaba skhem ba ka HSPDP kan ïoh ban thaw ïa ka Executive Committee (EC) hapoh ka Khasi Hills Autonomous District Council (KHADC).
“Ngi ngeit skhem ba hadien ba phi la puson bha bad ba mynta ka sngi phi la mih shakhmat ban jied ïa u nongmihkhmat jong phi ban long kum uta u MDC sha ka District Council, ngi kyrmen ba u Blei un da thoh shun ïa uno-uno uba ki paidbah da ka jingpuson bad ka jingshemphang jong ki, ki la lah ban pynurlong ïa kata”, ong u Bah Jubanlang.
Haba kylli, u Bah Jubanlang u la ong ba ka seng kan sa khmih ïa kata kham hadien ynda la pynbna ïa ki kyrteng jong ki kyrtong ki ban jop ha kane ka ilekshon.
“Khlem pep kata ruh ka dei kaba shisha namar phin da peit sha ka West Khasi Hills, phin ïohi ïa ka jinglhuh ki madan bad ka jinglhuh ka jingïalap ïa ki ilekshon. Ngim ong ba ka dei tang ka jingpyni ïa ka jingbun paid hynrei ngi ïohi ïa ka jingieid ba ki paidbah ki don ïa ka riti-ka dustur lajong bad kiba dang bat ïa kata ïa ka jinghikai u menbarim bad khamtam eh ban pyni ïa ka jinglong kyrpang jong ngi u paid Khasi baïar kiba long pher na kiwei-kiwei ki Jaitbynriew”, bynrap u Bah Jubanlang.
