Nongstoiñ, Rymphang 23
Ka jingïaseng Samla KJP Synod Sepngi kaba 23 kan long ha ka Balang Presbyterian Nongstoiñ naduh 28 tarik Rympha-ng haduh ka 2 tarik Lber 2025.
Ka Balang Presbyte-rian Nongstoiñ, haba phah ïa ka kyrwoh khubor ka la ong ba ka jaka long jingïaseng ha ka Sngi U Trai kan long ha ka madan harud surok intermediate lane Nong-stoiñ-Wahkaji, hajan TB Hospital Nongstoiñ.
Nangta, ka la ong ruh ba ki nongkren ha ka Sngi U Trai ha ka por 10.30 mynstep ki long u Rev. L Nongrud, 1.30 mynsngi u Rev. E.L Kharmawphlang.
Na ka liang ka Balang Presbyterian Nongstoiñ ka la ong ruh ba ka jingïaseng ha ka por 6.30 janmiet kan long ha ïingmane bad phyllaw jong ka bad ban kren ïa ka sobjek balang “Ka kyrteng jong me ka long kum ka jingiwbih ba la theh noh” (Jingrwai u Solomon 1:3) da u Rev. H.K Nongbsap.
Shuh shuh, ka kyrwoh khubor na ka Balang Presbyterian Nongstoiñ, ka khot sngewbha ïa baroh ki paid riewngeit na ki kynhun Balang bapher bapher ban ïa wan sha kane ka jingïaseng ha ka Sngi U Trai ka 2 tarik Lber, 2025.
Na ka liang ka Balang Presbyterian Nongstoiñ, ka la pyntip ruh ba la pynbeit ryntih ïa ki jaka ïeng kali na ka bynta kane ka Jingïaseng Synod, kiba wan lyngba ka surok Shillong-Sohpian-Nongstoiñ kin ïeng ha ki jaka pynïeng kali bad madan kiba don hapoh sor Nongstoiñ, kiba wan lyngba ka surok Rambrai- Nongstoiñ kin rung na ka shnong Tiehsaw sha Ladweitang haduh ïew Nongstoiñ, kiba wan lyngba ka surok Riangdo-Nongstoiñ kin ïaid lyngba ka surok Nondein-Law-ab-Wahriat shaduh shnong Nongstoiñ, kiba wan lyngba ka surok Maweit-Nongstoiñ kin ïaid lyngba ka surok Nongpyndeng-Wahriat shaduh shnong Nongstoiñ.
Shuh shuh kiba wan lyngba ka surok Mawkyrwat-Nongstoiñ kumjuh kiba wan na ka surok Umyiap-Nongstoiñ kin rung sha ki jaka ïeng kali kiba don ha u lum jingtep Mawpior hajan jaka long jingïaseng.
Ka Balang Presbyterian Nongstoiñ ka kyrpad ïa baroh ki nongwan jingïaseng ban ïa burom ïa ka jingpynïaid jong ki traffic Police/volunteer khnang ba kan ym don kano- kano ka dheng kali.
Shuh shuh ka la kyrpad ruh ïa ki nongwan jingïaseng ban kiar na ka jingïashong khapngiah ha ki kali jong ki bad ban kiar ruh na ka jingpynher sted khnang ban lait na kino-kino ki jingjia sngewsih.
“La kyrpad ruh ïa ki nongwan jingïaseng na ki shnong kiba marjan kum ka New Nongstoiñ, Upper New Nongstoiñ, Ladweitang, Mawkawah bad kiwei, ban kham kiar ban wanrah kali ha ka por mynsngi namar ki lynti sha ka jaka long jingïaseng ki dei ki surok bah ba madan bad kaba dang jan,” ong ka kyrwoh khubor na ka Balang.
Shuh shuh ka kyrwoh khubor ka ong ruh ba ka Balang ka la pynbeit ruh ban ym shah die jingdie harud ka surok bah Nongstoiñ-Wahkaji/Mawkyrwat kumba 200 meter na ka jaka long jingïaseng khnang ba kan ym don ka jingwit ïa ka ïaid ka ïeng jong ki nongwan jingïaseng.
