Washington, Rymphang:
U Kash Patel uba dei u nong India-America, u la bam smai ha ka Sngi Thohdieng kum u Director ba hynñiew ‘VII’ jong ka Federal Bureau of Investigation (FBI), ha kaba la pynbam smai ia u ha ka Bhagavad Gita.
Ha katei ka sngi, la ong ba ka baieid jong u Patel ryngkat bahaïing jong u, ki la ioh ban iadon bynta lang bad ban sakhi ia katei ka sngi ba khraw bad ba don burom jong ka iing jong ki katba u Patel u dang pule ïa ka jingsmai bad kiwei pat bahaiing ki la shong ha ka bynta shakhmat jong katei ka jaka ba la pynlong ia katei ka jingpynbam smai ha katei ka sngi.
La pynbam smai ia u Kash Patel ha katei ka sngi, da ka Attorney General jong ka US- ka Pam Bondi hapoh ka ïing Eisenhower Executive Office, ban pynkhamti ia u kum u Director ba hynñiew jong ka tnat FBI ban mih bujli ruh ha ka jaka jong u Christopher Wray uba long u heh barim jong katei ka tnat.
Hadien ba la dep pynbam smai, u Patel u la pynpaw ba kane ka jingjop jong u ka long ruh ka jingangnud jong ki nong America bad pynpaw ruh ia ka jing-kmen kaba khraw ba u ioh ban long u nong-ialam ban iatreilang bad ki bor jong katei ka ri bad ban wanrah ruh ia ka jingiadei kaba bha hapdeng ka US bad India ha ki liang bapher bapher bad ha ki por ki ban wan.
U la ai ruh ia ka jingkular kaba skhem ban pynthikna ia ka jingkitkhlieh kaba pura na ka bynta ki kam jong ka tnat FBI bad na ka bynta ka bha- ka miat jong u paidbah nongshong shnong ka US hi baroh kawei.
Ha kajuh ruh ka por, u President ka US- u Donald Trump, u la pynpaw ia ka jingkyrshan kaba jur ia u Kash Patel bad u la ong ba u dei u briew uba khlaiñ bad uba shemphang bha bad dei kane ka daw ba ka US ka shaniah ban aibor ia u ba un long u nong-ialam jong katei ka tnat ba kongsan jong ka ri.
